Жиында осыған дейінгі Жолдауды қолдау мақсатындағы іс-шаралар талқыланып, жетістіктер атап өтілді. Мәселен, 2016-2017 оқу жылында «Барша үшін тегін кәсіптік-техникалық білім» бағдарламасы негізінде 3 айлық қысқа мерзімді курс бойынша Талғар ауданының жұмыссыз және әлеуметтік жағдайы төмен 200 тұрғыны жұмысшы мамандығын оқыды. Білім алушылар тегін білім алып, қосымша төлемақымен қамтамасыз етілді. Ең бастысы, жұмыспен қамтамасыз етілді.
2017-2018 оқу жылында қоғамның қажеттілігі мен кәсіпорындардың сұраныстарына орай, «Электронды есептеу машиналарын баптаушы», «Автоэлектрик» мамандықтары ашылды. Бүгінде Талғар ауданы өңірінен колледжімізде 50 студент осы мамандық бойынша білім алуда. Сондай-ақ 11-сыныптан кейін «Автоэлектрик» мамандығы бойынша 62 білім алушыны 10 айлық бағдарлама негізінде оқуға қабылдадық.
Жолдауда атап өтілгендей, стандарттар қайта қарастырылып, колледжіміздің «Тігінші», «Аспаз», «Автослесарь», «Электрогаздәнекерлеуші» мамандықтары модульдік оқыту жүйесіне ауыстырылды.
Биылғы оқу жылына да білім беру мазмұнын жаңарту мақсатында қосымша екі мамандық ашуды жоспарлап отырмыз. Ол мамандықтар республика көлемінде қажеттілік туындатып отырған «Слесарь-сантехник», «Автокран жүргізушісі», «Бульдозер жүргізушісі» сияқты жұмысшы мамандықтары болып табылады.
2016-2019 жылдарға арналған ғылым мен білімді дамытудың бағдарламасын жүзеге асыру жұмыстары аясында 15 жоғары оқу орнымен меморандумға отырып, колледж өз жұмысын жүйелі жүргізіп келеді. Бүгінде Жолдаудағы міндеттерге жоғары оқу орындарымен бірлесе қол жеткізіп отырмыз. Атап айтсақ, колледжге қажетті мамандарды меморандум шарттары негізінде жұмысқа қабылдау, ғылыми жұмыстармен бірлесе айналысу, колледж оқытушылары мен өндіріс шеберлерінің біліктілігін арттыру мүмкіндіктеріне жол ашылды.
Жолдауда Елбасы диплом беріп қана қоймай, жұмыспен қамтамасыз ету мәселесін атап өтті. Колледжіміз дуалды оқыту жүйесін қалыптастыру арқылы бұл мәселені де 95 пайызға орындап келеді.
Былтыр оқу жылының желтоқсан айында 2 оқытушымыз Финлияндия мен Малайзия елдеріне барып білім алып келді. Гүлжаухар Нұрғалиева Финлияндия елінен менеджерлік құзыреттілікті үйреніп қайтты. Шетелдің қысқы педагогикалық тәжірибесімен бөлісіп қайтқан әріптестеріміз колледждің басқа оқытушыларын оқытуды жоспарлап отыр. Талғар политехникалық колледжі ұжымы қашанда Елбасымыздың Жолдауын қолдау мақсатындағы жұмыстарда қажырлықпен еңбек ете бермек.
Жұмағали КИБЕКБАЕВ,
Талғар политехникалық колледжінің директоры
Алматы облысы