Гастроль «Рухани жаңғыру» бағдарламасы аясында Мәдениет және спорт министрлігінің қолдауымен ұйымдастырылды. Тур қазақ музыкалық өнерінің әйгілі туындысы – А.Жұбанов пен Л.Хамидидің «Абай» ұлттық классикалық операсымен басталды.
Қойылымдар Қазақстанның және Италияның айтулы өнер қайраткерлерінің қатысуымен сахналанған. Алғашқы спектакльге музыкалық жетекші әрі дирижері болған Қазақстанның еңбек сіңірген қайраткері, Алан Бөрібаев. Қоюшы режиссер – танымал италиялық режиссер Джанкарло дель Монако. Мұхтар Әуезовтің либретто желісі бойынша жасалған ұлы жауһар шын мәнінде шырқау шабыттың шынай жемісі болды.
– Бұл гастроль біз үшін аса маңызды әрі жауапты, себебі, бірінші кезекте, өзімізге жақын қазақстандық көрермендермен қауышамыз. Труппамыздың көпшілік әртісі өздерінің ұстаздарының алдына шығып, өнерін көрсетеді, ал олар шәкірттерінің кәсіби шеберлігіне бағасын бермек. Біз үшін бұл кезекті емтихан. Тұтастай алғанда, труппаға гастрольдік сапарлар, өзара тәжірибе алмасу қажет. Алматылықтар үшін «Абай» операсын бекер таңдаған жоқпыз, бұл туынды ұлттық өнеріміздің бетке ұстар жауһарына айналды. Осы операны орындау арқылы біз Абай атындағы опера және балет театрына деген құрметімізді білдіреміз, – деп атап өтті «Астана Опера» театрының директоры Ғалым Ахмедьяров.
Оның ертеңіне гастрольдік бағдарламаны сәтті жалғаған ХХ ғасырдың атақты хореографы Кеннет Макмилланның «Манон» балеті болды. Балет туындысы аббат Превоның «Кавалер де Грие мен Манон Лесконың оқиғасы» романының желісі бойынша жасалған. «Астана Операның» репертуарындағы шырайлы шығарма жақында ғана көрермен назарына ұсынылды. Қойылымды астаналық сахнаға Корольдік балет труппасының дәстүрін сақтаушылар – қоюшы балетмейстерлер Карл Бёрнетт пен Патрисия Руанн ала келген. Оның қоюшы дирижері Арман Оразғалиев. Оркестрге өңдеген – Мартин Йетс. Атап өтетін маңызды жайт, спектакль Ресейдің Халық әртісі, балет труппасының көркемдік жетекшісі Алтынай Асылмұратованың арқасында театрдың қоржынын толықтырды. Әйгілі өнерпаздың өзі бірнеше рет басты Манон партиясын аты аңызға айналған лондондық сахнада билеп, Кеннет Макмилланмен бірге бейнені жасауда жұмыс атқарған. Оның осы жауһар туындыны елорда сахнасына алып келу туралы ұсынысын қоюшы топ қуана қабыл алды.
– М.Жаррдың «Париж Құдай анасының соборын» «Астана Опера» театрының труппасы Мария театры (Санкт-Петербург) мен Карло Феличе (Италия) сахнасында орындаған еді, бірақ «Манон» балетін гастроль аясында алғаш рет ұсынбақпыз. Қазіргі таңда бұл хореографиялық туындыны ағылшын классикасы деп санайды. Спектакльде әрдайым жағымды кейіпкерлер болады, көрермендер олардың қасіретіне ортақтасады, әйтседе, жағымсыз бейнелер де жоқ емес, бірақ қоюшы режиссер оқиғаны шебер жеткізгені соншалық, біз барлық қаһарманға жылы шырай танытып, уайым-қайғысына ортақтасып отырамыз, – деді Алтынай Асылмұратова.
Мұндағы Манон партиясын Қазақстанның еңбек сіңірген қайраткері Мәдина Басбаева орындады. Алматыдағы гастрольдік сапар Морис Жаррдың «Париж Құдай анасының соборы» балет спектаклін көрсетумен аяқталады.
Мерей ДІЛДАБАЕВ
