Нидерланд елшілігінде төрағалық қызметтің қорытындысы талқыланды

Іс-шараға Нидерланд Сырт­­қы істер министрлігінің БҰҰ Қауіп­сіздік Кеңесінің мәсе­­­лелері бо­йын­ша арнайы тобы­ның үйлес­ті­рушісі Роберт Дресен, БҰҰ Қауіп­сіздік Ке­ңе­сі­нің тұрақ­ты емес мүше ел­дерінің елшілері, «Клин­гендайл» же­текші талдау орта­лығының сара­пшылары және басқа да нидерландтық ака­демиялық топтардың белгілі өкіл­дері қа­тыс­ты.

Өз сөзінде Қазақстан елшісі Мағ­жан Ілиясов Қазақстан тө­рағалығының шеңберінде ке­ңес­­тер, брифингтер және пікір­­таластар үлгісінде отызға жуық отырыстар өткізіліп, олар­дың қо­­рытындылары бойын­ша Кеңес төрағасының қарар­лары және мә­лім­демелері қабыл­дан­ғанын атап өтті. Қазақстан диплома­ты Пре­зидент Нұр­сұлтан Назар­баев­тың 18 қаң­тар­дағы саяси Үндеуі­нің негізгі бағыттарына ерекше на­зар ауда­рып, олардың ішінде Қазақ­станның БҰҰ Қауіпсіздік Кеңесіндегі жұмысының ба­сым­­­дықтары мен тәжірибелік ком­по­нент­тері көзделгені туралы айтты.

Сонымен қатар Қазақ­стан­ның Әлемдік терроризмге жол бермеу туралы мінез-құлық кодексі жоба­сын іске қосу бойын­ша жоғары деңгейдегі арнайы іс-шара өткізгені туралы атап айтылды. БҰҰ-ның оның ішінде тер­роризмге қарсы құрылым­дардың басшылығы, мүше мем­ле­кеттердің жүзден астам деле­гацияларының өкіл­дері атал­ған кодекстің өзектілігі мен маңыз­дылығын қолдады.

Өз кезегінде дөңгелек үстелге қатысушылар Қазақ­станның БҰҰ Қауіпсіздік Ке­ңесінің төрағасы ре­тіндегі жетіс­тіктерін жоғары баға­лап, Ауғанстандағы жағдайды тұрақ­­тандыруға бағытталған біз­дің еліміздің практикалық күш-жігерін атап өтті.

19 қаңтарда өткен Ми­нистр­лік пікірталастардың қар­саңында БҰҰ Қауіпсіздік Кеңесі мүшеле­рінің Ауғанстанға же­ті жылдың ішінде ұйым­дас­тырылған алғаш­қы сапары бұл елдің ішкі және ай­на­ласындағы тұрақтылық пен өр­кендеуді қолдау үшін шешуші маңыз­ға ие болғаны атап айтылды. Сонымен бірге Қазақстан және Президент Н.Назарбаевтың жап­пай қырып-жоятын қаруды таратпау ісіне қосқан елеулі үлесі ерекше атап өтілді. Кездесу барысында БҰҰ Қауіпсіздік Кеңесі тұрақты емес мүшелерінің 2018-2019 жыл­дарға арналған күн тәртібі бо­йынша жан-жақты пікір алмасу болды.

Кездесуді қорытындылай келе, Роберт Дресен: «Қазақ­станның Қауіп­сіздік Кеңесі­нің төрағалығы әлем­дік қауым­дастыққа ең өзекті мәсе­лелерді шешуге сындарлы көзқараспен қарайтынын көрсет­ті. Атап айтқанда, бұл өз кезегінде Ауған­­­стандағы қауіпсіздікті ны­­ғайту үшін маңызды өңірлік эко­но­микалық жобаларды, оның ішінде инфрақұрылымды дамыту, электр энергиямен жабдықтау, сауда-саттық пен транзит қыз­мет­терін қеңейту жобаларын іске асыруға жол ашады», деп мәлімдеді.

«Егемен-ақпарат»