Алтыншы сайланған Парламент Мәжілісінің өкілеттіктерін іске асырудың үшінші сессияға арналған негізгі іс-шаралар жоспарына сәйкес ұйымдастырылған осы шараға Мәжіліс депутаттары, Қорғаныс министрлігінің, ҰҚК Шекара қызметінің, Ұлттық ұлан қолбасшылық құрамының өкілдері қатысты.
Бейінді комитет төрағасы Мұхтар Ерман көшпелі отырысты аша келе, Қазақстан Республикасы тәуелсіздік алған кезден бері Мемлекет басшысы, Жоғарғы Бас Қолбасшы Нұрсұлтан Әбішұлы Назарбаевтың қамқорлығы арқасында заманауи, тиімділігі жоғары, ұтқыр Қарулы Күштер құру бойынша орасан зор жұмыс атқарылғанын атап өтті. Қорғаныс саласындағы стратегиялық құжат болып табылатын Қазақстан Республикасының Әскери доктринасы бекітілді. Өз кезегінде ел Парламенті де бұл жұмыстан шет қалып отырған жоқ. Елдің қорғаныс қабілетін арттыруға және әскери қызметшілер мен олардың отбасы мүшелерінің әлеуметтік жағдайын жақсартуға бағытталған бірқатар маңызды заңнамалық актілер қабылданды.
Осы жұмыс сапары барысында Мәжіліс депутаттары Қорғаныс министрлігі, Ұлттық ұлан және ҰҚК Шекара қызметі әскери бөлімдерінің жауынгерлік әзірлік мәселелерін зерделеді.
Аталған әскери бөлімдерде депутаттар қару-жарақ құрамындағы техниканы қарап шығып, механикаландырылған бригаданың әскери қызметшілерін дайындау жөніндегі тренажерлік кешеннің мүмкіндіктерімен танысты.
Парламентшілерге заманауи қару-жарақ, әскери техника мен мүлік үлгілері, бөлімшелердің жауынгерлік әзірлігі көрсетілді.
Осы шара барысында Мәжіліс депутаттары Қорғаныс министрлігі таулы-егерлік бөлімшесінің орналасқан жерін барып көріп, Ұлы Отан соғысының даңқты батыры Бауыржан Момышұлының ескерткішіне гүл қойды.
Хамит ЕСАМАН,
«Егемен Қазақстан»
