Облыстың экономикалық даму деңгейінің басым бағыттарының бірі – аграрлық сектор. Мәселен, экспорт әлеуетін арттыру үшін облыста мал шаруашылығын дамытудың кешенді бағдарламасы іске асырылуда. Ал ет өндіру және өңдеу ісі өңір экспортын алдыңғы қатарға бастауы тиіс.
– Ең бастысы, бәсекелестікке бастар мүмкіндіктерді пайдалана отырып, артықшылықтар тиімді қолдану, – деді облыс әкімі Даниал Ахметов, – сондықтан жоғары сапалы дайын өнімдер нарығына шығу үшін аустралиялық «Еуразия АгроХолдинг» ЖШС компаниясымен тізе қосып, Аягөз ауданында ет өңдейтін комбинат салу жұмыстары жүргізілуде. Бұдан бөлек біздің тарапымыздан нысанға 468 млн теңгенің барлық қажетті инфрақұрылымы жүргізіліп, жобалау-сметалық құжаттамасы әзірленіп жатыр.
Сондай-ақ «АгроПортал» ЖШС ирандық компанияның қатысуымен Семейде ет өңдеу комбинатының құрылысы бойынша ірі инвестициялық жобаны жүзеге асыруға дайын. Осы ретте өткен жылдың соңында ИДМ Инвестициялар комитеті мен «АгроПортал» ЖШС арасында инвестициялық келісімшартқа қол қойылғандығын атап өткен жөн.
Сонымен қатар Шығыс Қазақстанда халықаралық стандарттар бойынша ауылшаруашылық өнімдерін сұрыптаудың бүкіл жиынтығын жүзеге асыратын зертхана ашылады. Облыс басшысының айтуынша, «қытайлық стандарттар бойынша сертификаттау – аспанасты елінің нарығына апаратын төте жол».
– Біз үшін Қытай нарығы маңызды, – деді Даниал Кенжетайұлы, – қазіргі күні облыста қазақстандық өнімдерді қытайлық стандарт бойынша сертификаттау зертханасын құру жұмыстары жүргізілуде. Осы мәселе бойынша биыл қаңтарда Қытай Халық Республикасынан бір топ маман біздің облысқа келіп қайтты. Зертхананы орналастыратын ғимарат дайындалуда. Құны миллиардтан астам теңге болатын қондырғыны жеткізу жұмысын қазан айында бастаймыз.
Раушан НҰҒМАНБЕК, журналист
СЕМЕЙ
