Фото: Ерлан ОМАР, «Егемен Қазақстан»
Елорда төріндегі Тәуелсіздік сарайын думанға бөлеген аталмыш оқиғаға Еуропада тұратын тілші-журналист Бәшір Жаналтай, Өзбекстандағы қазақ ұлттық мәдени орталығының өкілі Клара Садырбаева бастаған шетелдердегі қазақ диаспоралары және атажұртына оралған зиялы қауым өкілдері қатысып, ұлыстың ұлық мейрамы – Наурызды атап өтті.
Мәдени шараға жиналған қауымға ақжарма тілегін арнаған мемлекет және қоғам қайраткері Мырзатай Жолдасбеков, қандастарды келе жатқан Ұлыс күні мерекесімен құттықтай отырып, халқымызды осындай жақсылыққа жеткізген бір тәңірге шүкіршілік ететінін емірене айтты. Сонымен қатар қайраткер-ғалым: «Наурыз әуелі татулық мейрамы. Татулықтың өзегі – бірлік пен береке. Біздің бабаларымыздан қалған ең үлкен аманат та осы. Қазіргі тәуелсіздік дәуірінде осы аманатқа адал болуымыз керек», деді.
Жаңа қызметке кіріскеніне сегіз айдың жүзі болған Дүниежүзі қазақтары қауымдастығы Төрағасының бірінші орынбасары Зауытбек Тұрысбеков, осы аралықта атқарылған жұмыстың барысы жайлы баяндап, жиналған көпшілікпен алдағы жоспарымен бөлісті. – Ең әуелі, – деді Зауытбек Қауысбекұлы, – елдегі демографиялық ахуалды жақсартудың бір жолы шеттегі қазақтарды атажұртқа әкелу. Ол үшін олардың баспана және жұмыс мәселесін шешу керек. Осы мақсат үшін қазіргі таңда Астана маңынан 200 гектар және Шымкент қаласы төңірегінен дәл осындай жер телімін алып, жаңадан елді мекен тұрғызу ісін қолға алмақпыз.
Мұның сыртында елорда маңына көкөніс өсіретін өте үлкен аумаққа жылыжай салып, одан шыққан өнімдерді сататын арнайы базар ашып, қоныстанушы қандастарды жұмыспен қамтымақ екен. Атап өтуге тұрарлық тағы бір жаңалық Қауымдастық Елбасы тапсырмасымен құрылған «Отандастар» қоры арқылы үстіміздегі жылы 150-ден астам мектеп жасындағы жасөспірімді (шетелде өмір сүріп жатқан) Бурабайдағы «Балдәурен» демалыс лагеріне әкеліп, олардың тіл үйренуіне және еліміздің тарихи орындарымен танысуына жағдай туғызбақ. Бұл іс жыл сайын жалғасын табады және уақыт озған сайын демалушы балалардың да саны артады. Сонымен қатар бұған дейін атажұртына оралып, әр салада абыройлы қызмет етіп жүрген тұлғалардың да еңбегі насихатталмақ.
Осылай маңызды басқосу үстінде өзінің алдағы жоспар-жобасымен таныстырған З.Тұрысбеков, бұдан былай 21 наурызға «Отандастар күні» деген мәртебе беріп, оны Ұлыстың ұлы күні қарсаңында күллі ел көлемінде қандастарға ықылас танытатын датаға айналдыруды жиын қонақтарына ұсынды. Ұсыныс бірден қолдау тапты.
Жиынның соңында қонақтар арнайы дайындаған өнерпаздардың концертін тамашалап, С.Ысқақбекұлы, Б.Жалын, Б.Зерде, А.Ақымбек, Г.Сырымгүл қатарлы қылқалам шеберлерінің картинасын, Г.Тоқанқызы бастаған бізкестешілердің өнері мен Б.Қопылайқызының қолынан шыққан оюлы сырмақтарды тамашалап, көзайым болды.
Бекен ҚАЙРАТҰЛЫ,
«Егемен Қазақстан»
