Қорғаныс ведомствосының басшысы Әділбек Жақсыбековтің төрағалығымен Қазақстан Республикасы Қорғаныс министрлігінің алқа отырысы болып өтті. Күн тәртібіне сәйкес, Қарулы Күштердің 2011 жылғы қызметінің қорытындысы қаралып, алдағы 2012 жылға нақты тапсырмалар қойылды. Сондай-ақ, Қазақстан әскерінің басшылық құрамы Қазақстан Республикасы Тәуелсіздігінің 20 жылдығы мен Қарулы Күштердің 20 жылдығын мерекелеуге дайындық барысын талқылады. Жауынгерлік әзірліктің, жауынгерлік кезекшілік пен әскери тәртіптің жай-күйі де кеңінен сөз болды.
Отырысты ашқан Қорғаныс министрі барлық командирлерге қаратып: «Қол жеткізілген көрсеткіштер көңіл қуантарлық, енді негізгі назарды жауынгерлік әзірліктің сапасына аудару керек. Елбасы – Қарулы Күштердің Жоғарғы бас қолбасшысының бізге қойып отырған басты талабы осы», деді.
Қазақстан Республикасы Тәуелсіздігінің 20 жылдығымен тұспа-тұс келген Қарулы Күштердің биылғы қызметі командирлік дайындықтың жаңа кешені анықталып, жауынгерлік әзірлік пен атыс курстарының жаңа бағдарламалары жасалуымен ерекшеленді.
Алқа отырысында әскери оқу орындарында офицерлер дайындау мәселелері де көтерілді. Мамандарды өз елімізде дайындау қажеттілігі қадап айтылды.
Өтіп бара жатқан жыл әскерлердің жауынгерлік оқуы мен оқу-жаттығуларына толы болды. Сол себепті де, 2012 жылы негізгі күш оны жетілдіруге, жеке құрамды дербес оқытуға және «Қарулы Күштердің 20 жылдығына – Қазақстанның қауіпсіздігін қамтамасыз етуге жұмсалып, біздің жанқиярлық еңбегіміз» ұранымен өтпек.
Оксана ПАРПУРА, Қорғаныс министрлігі баспасөз қызметінің өкілі.