Жиын барысында Қоғамдық денсаулық сақтау комитеті төрағасының орынбасары Берік Шарипов БАҚ-та Батыс және Шығыс Қазақстан облыстарында дәрі-дәрмекпен қамтамасыз етудегі кідіріс мәселесі көтерілгенін жеткізді.
«Қазіргі таңда қазақстандықтарды амбулаторлық дәрі-дәрмекпен қамтамасыз ету үшін тізімге енгізілген барлығы 494 дәрілік заттар мен медициналық мақсаттағы бұйымдардың 430 атауы сатып алынды. Бірыңғай дистрибьютор тізімі бойынша стационарлық және амбулаторлық дәрі-дәрмекпен қамтамасыз етудің жалпы көлемінің 95 пайызы амбулаторлық және стационарлық дәрі-дәрмекпен қамтамасыз ету үшін барлығы 1040 дана сатып алынды. Әлі де 66 препарат сатып алынған жоқ. Бірақ оларға шекті бағалар қайта қарастырылып, сатып алу қайтадан жарияланды», деді спикер.
Сонымен қатар ол Батыс Қазақстандағы жағдай бойынша баяндама жасап, қазір БҚО-да амбулаторлық та, стационарлық та дәрі-дәрмекпен қамтамасыз ету үшін дәрілік заттардың барлық қажетті қорлары бар екенін жеткізді.
«Қаңтар және ақпан айларына қажеттілік бойынша сатып алынған препараттар толық көлемде жөнелтілді. Қазір наурыз айына қажеттілікті дәріхана пункттеріне жөнелту жалғасуда. Сол жерден дәрілер пациенттерге беріледі. Қазіргі уақытта 2018 жылдың алғашқы үш айында амбулаторлық дәрі-дәрмекпен қамтамасыз етуге жалпы сомасы 606,1 млн теңгені құрайтын 246 дәрілік заттар және медициналық мақсаттағы бұйымдар атауы түсті. Бұл сома облыстың дәрілік заттарға сұранысының жалпы көлемінің 63 пайызын құрайды. Соның ішінде қант диабетін емдеу үшін аймаққа 34 млн теңге тұратын дәрі-дәрмектер жөнелтілді», деп атап өтті ол.
Рауан ҚАЙДАР,
«Егемен Қазақстан»
