Мұндай әңгіменің қозғалуына Сенат депутаттары Мұрат Бақтиярұлы мен Бекмырза Еламановтың Қызылорда облысы, Қармақшы, Жалағаш және Жаңақорған аудандарының тұрғындарымен, шаруа қожалығы өкілдерімен, ардагерлер кеңесімен, аудандық маслихат депутаттарымен, емхана ұжымымен сондай-ақ аудан белсенділерімен кездесу барысында осы салада жұмыс істеп жатқан еңбеккерлердің ауыл шаруашылығы кооперативтері туралы заң әлі өз дәрежесінде жұмыс істеп жатқан жоқ деген уәжі себеп болды.
«Кооперативтердің рөлін күшейту үшін, оларды қанаттандыратын ынталандыру тетігі қарастырылып, қажетті дәрежеде қаржыландырылуы керек» деді шаруа қожалықтарының өкілдері.
Кездесу кезінде депутаттар тұрғындармен ой-пікірлер алмасып, соңы емен-жарқын ашық әңгімеге ұласты. Елбасы үндеуінің басымдықтарын нәтижелі жүзеге асыруға жан-жақты талқылаулар жасалып, сенаторлар жиналған жұртты елімізді өркендету жолында жұмыла жұмыс жасауға шақырды.
Сонымен қатар, Сенат депутаттары аудан активтерімен бірге апатты жағдайдағы ауруханаларды аралады, шешімін таппай келе жатқан Жалағаш аудандық орталық аурухана құрылысын қаржыландыру, Жалағаш ауданының орталығын газдандыру мәселесі сияқты ауқымды проблемалық сұрақтарға назар аударды.
Мұрат Бахтиярұлы және Бекмырза Еламановпен кездескен ауыл тұрғындары өздерінің өтініштері мен ұсыныстарын айтты. Солардың бірі – жерді жалға беру институтын қалыптастыру мәселесі. Жиналған халық көкейлеріндегі сұрақтарға қанағаттанарлық жауап алып тарқасты.
