Меморандумға Қазақстан мен Испания халықтары арасындағы дәстүрлі достықты, өзара түсіністік пен сенімділікті одан әрі нығайту, достық қатынас орнату және екі ұйымның арасындағы жан-жақты ынтымақтастықты кеңейту, жастар алмасуын ілгерілету, әлеуметтік, мәдени, ғылыми, білім беру және басқа да салалардағы ынтымақтастықты дамыту, жан-жақты стратегиялық әріптестікті ұлғайту мақсатында қол қойылды.
Меморандумға қол қоюға «Азия үйі» бас директоры Дэвид Наварро Гарсия және Елбасы Қоры атқарушы директорының орынбасары Сұлтан Айтжанов қатысты.
Екіжақты ынтымақтастық бойынша бірлескен іс-шаралар өткізу, Қазақстан мен Испания жастарының достық сапарлары, білім беру, ғылым, мәдениет саласындағы бірлескен жобалар мен бағдарламаларды әзірлеу және іске асыру және университеттер, зерттеу орталықтары және басқа да мекемелермен тікелей ынтымақтастық аясында жүзеге асырылады.
«Азия үйі» – Азия мен Тынық мұхиты елдерінде мамандандырылған мәдени және білім беру мекемесі. Барселонада орналасқан бұл мәдени орталық көрмелер, конференциялар мен семинарлар ұйымдастырады. Орталық зерттеу-талдау жұмыстарымен айналысуға мүмкіндік береді. «Азия үйі» 2001 жылы Испания үкіметінің Сыртқы істер және ынтымақтастық министрлігі, Каталония үкіметі, Барселона мен Мадрид қалалық кеңестерімен бірлесе құрылды.
Бұдан басқа, Елбасы Қоры тарапынан Мадридте «Астана – ұлы даланың інжу-маржаны» атты фотокөрме ұсынылды.
Фотокөрме Испания королі Филипп VI 2014 жылы ашқан Карлос де Амберес Қорының (Fundación Carlos de Amberes) ғимаратында өтті.
Фотокөрмені ашу барысында Қазақстанның Испания Корольдігіндегі Төтенше және өкілетті елшісі Бақыт Дүйсенбаев және Қазақстан Республикасының Тұңғыш Президенті – Елбасы Қоры атқарушы директорының орынбасары Сұлтан Айтжанов құттықтау сөз сөйледі.
Астана құрылыстарының 100-ден астам картиналары және «Беймәлім Қазақстан» фотосуреттер сериясынан тұратын Қазақстанның бірегей табиғаты көрсетілген фотокөрмені тамашалауға белгілі қоғам және саяси қайраткерлер, сондай-ақ Испанияның мәдениет және өнер майталмандары келді.
Қонақтар Ұлы даланың, Еуразия жүрегіндегі ультразаманауи қаланың сұлулығы мен бейнесін жарқын фотосуреттер арқылы тамашалады.
Сонымен бірге көрме қонақтарына Елбасы Қорының тапсырысы бойынша әзірленген «A day in Astana» фотоальбомы сыйға тартылды.
«Егемен-ақпарат»
