Парламент • 13 Сәуір, 2018

Сенаторлар өрт қауіпсіздігін қамтамасыз ету жөнінде қосымша шаралар қабылдауды ұсынды

342 рет
көрсетілді
4 мин
оқу үшін

Парламент Сенаты Халықаралық қатынастар, қорғаныс және қауіпсіздік комитеті ұйымдастырған кездесу барысында әлеуметтік және өнеркәсіп нысандарының өрттен қауіпсіздігі, сондай-ақ еліміздегі су тасқынына қарсы күрес жағдайлары талқыланды, деп хабарлайды Парламент Сенатының баспасөз қызметі. 

Сенаторлар өрт қауіпсіздігін қамтамасыз ету жөнінде қосымша шаралар қабылдауды ұсынды

Комитет төрағасы Дариға Назарбаева көрші елдің Кемерово қаласында орын алған қайғылы оқиғаға байланысты тұрғындар қауіпсіздігіне, әсіресе балаларды түрлі қатерден қорғауға баса назар аударылып отырғанын атап өтті. Кемерово оқиғасы – адамдар қауіпсіздігін ең бірінші кезекке қоятын, әрқайсымызды оқиға зардаптары туралы ойлауға міндеттейтін ащы сабақ болды.

Ішкі істер министрлігі төтенше жағдайлар жөніндегі комитетінің төрағасы Владимир Беккер адамдар көп келетін нысандардың өрттен қауіпсіздігін қамтамасыз ету шаралары және осы саладағы өзекті мәселелер туралы депутаттарды хабардар етті.

Парламентшілер адамдар көп жиналатын әлеуметтік инфрақұрылымдар меншік иелерінің өрттен қауіпсіздік талаптарын бұзғаны және сақтамағаны үшін жауапкершілігін күшейту жөніндегі нормативтік құқықтық актілерге өзгеріс енгізу қажеттігін атап өтті. Сондай-ақ мұндай нысандарды Экономикалық ынтымақтастық және даму ұйымы елдерінің тәжірибесі бойынша өрт жағдайына  міндетті сақтандыруды енгізу ұсынылды.

Білім және ғылым министрлігіне жалпы білім берудің бастауыш және орта білім бағдарламасына өрттен қауіпсіздік ережелерін оқыту және төтенше жағдайлар болған кезде дұрыс әрекеттер жасауға дағдыландыруды қосу мүмкіндігін пысықтау ұсынылды.

Депутаттар сондай-ақ өрт қауіпсіздігін қамтамасыз ету саласында жұмыс істеп келе жатқан кәсіпорындардың қызметін лицензиялауды қайтаруды да ұсынды.

Отырыс барысында В. Беккер еліміздегі тасқын су және елді мекендерді су басып кетуге орай ескерту жөніндегі жүргізіліп жатқан жұмыстар туралы баяндады.

Талқылау қорытындысы бойынша сенаторлар төтенше жағдайлар жөніндегі комитет бөлімшелерінің жергілікті атқарушы органдармен жұмыстарында үйлесімнің жоқтығын, сондай-ақ төтенше жағдайлар жөніндегі облыстық департаменттердің және жұмылдыру дайындығы, азаматтық қорғаныс басқармалары, әкімдіктердердің авариялар мен табиғи апаттарды ескерту және зардаптарын жою ұйымдары міндеттерінің қосарлануы туралы атап өтті. Сенаторлар тиісті қызметтердің әкімшілендіру жүйесіне реформа жүргізуді және жергілікті атқарушы органдардың көктемгі су тасқынына дайындық жұмыстарын нашар жүргізгені үшін жауаптылығын күшейтуді ұсынды.

«Кәсіби әскерилендірілген авариялық-құтқару қызметі» республикалық мемлекеттік кәсіпорны бас директорының міндетін атқарушы  Диқанбек Сатылғанов осы қызметтің жұмысы туралы жан-жақты баяндап берді. Оның міндеттері аясында тауда құтқару, қауіпті өндіріс нысандарындағы су бұрқағына қарсы, газдан құтқару жұмыстарын орындау бар. Бүгінгі таңда авариялық-құтқару міндетін бәсекелестер ортасына беру, ал РМК-ны жеке қолға беру туралы шешім қабылданды. Тұрғындардың, стратегиялық маңызы бар ірі өндіріс нысандарының қауіпсіздігі мемлекеттік органдар тарапынан жан-жақты, мұқият зерделеуді және бақылауды талап ететіндіктен депутаттар қауіпті өндіріс нысандарын авариядан ескерту  және оның зардаптарын жою жөніндегі бірыңғай мемлекеттік қызмет – «Кәсіби әскерилендірілген авариялық-құтқару қызметі» республикалық мемлекеттік кәсіпорнын сақтау, оны жекешелендіруге жататын ұйымдар тізімінен алып тастауды ұсынды.

Қазіргі кездегі бәсекеге қабілетті нарықта сапалы балама қызмет әзірге құрылған жоқ. Тәжірибе көрсетіп отырғандай, жеке компаниялардың тиісті тәжірибесі де, өнеркәсіп орындарындағы төтенше жағдай орын алғандай болғанда дұрыс көмек беретін жабдықтары да жоқ.

Кездесу қорытындысы бойынша ұсыныстар әзірленіп, Қазақстан Республикасының Үкіметіне жіберілетін болды.