Тарихи әділеттілік. Парламент Сенаты кеше қабылдаған шешімнің хабары жеткенде ойға алдымен осы сөз оралды. Иә, Қазақстан Республикасының Тұңғыш Президенті, Елбасымыз Нұрсұлтан Әбішұлы Назарбаевқа «Халық Қаһарманы» атағын беру мүмкіндігін қарастыратын заңдардың қабылдануын ең алдымен тарихи әділеттілік актісі деп қарау орынды. Заң жобаларын қабылдау арқылы Сенат халықтың талайдан бері айтылып келе жатқан тілегін жүзеге асырды. Сенат Төрағасы Қайрат Мәми бұл жөнінде: «Ұсынылып отырған толықтырулар Президент Нұрсұлтан Назарбаевтың тәуелсіз мемлекетті құру мен дамытудағы, Қазақстанның әлемдік қоғамдастықтағы беделін нығайтудағы тарихи рөлін тиянақтайды» деп өте орынды айтыпты.
Елбасымыз ел сөзін ескереді деп сенеміз. Ашығын айтсақ, ескеруге тиісті де тіпті.
«Егемен Қазақстанның» оқырмандарын Елбасымыздың ерен еңбегінің тұңғыш Президент сайлауы өткен тарихи күннің дәл жиырма жылдығында лайықты бағалануымен құттықтай отырып, біз редакция тілшілеріне осы шешімнің қабылдануына тікелей қатысқан Сенат депутаттарымен шұғыл хабарласып, олардың ойларын жұртшылыққа жедел жеткізуді тапсырдық. Осы ұсынысты алғаш жария еткен белгілі тұлға В.И.Двуреченскиймен де телефон арқылы болса да сөйлесіп қалдық. Енді сол пікірлерге кезек берейік.
Елбасымыз Нұрсұлтан Әбішұлы Назарбаевтың мемлекет алдындағы еңбегі ұшан-теңіз. Президент Қазақстан Республикасы атты осы мемлекетті өз қолымен құрды, оны Тәуелсіздіктің тәуекелге толы тайғақ кешулерінен аман-есен алып өтті, елдің ойын биіктетті, бойын тіктетті, халықтың әл-ауқатын арттыруға қол жеткізді, елді әлемдік ықпалдастыққа кіріктірді, тұрақты саясатымен, қуатты экономикасымен дүние дидарында сыйлы етті, көп дінді, көп тілді елден ортақ отандастығын мақтан ететін біртұтас мемлекет, Қазақстан халқын қалыптастырды, ұлтымыздың жақсы атын жаһанға жайып, абыройымызды асырды, рухымызды асқақтатты.
Біздің еліміздегі осы жиырма жылда жүзеге асқан жақсылықтың бәрінің де бастауында бір адам – Елбасымыз тұр. Президент қабылдаған шешімдердің, соның ішінде кезінде біраз адам тосырқай қараған шешімдердің де, бәрінің дұрыстығы уақыт өте келе кемелдікпен көрінді. Тәуелсіздік тарихының қиын белестерінде Президент командасында облыс әкімі болып жұмыс істеген адам ретінде мен мұны өте жақсы білемін.
«Жақсының жақсылығын айт, нұры тасысын» дейтін халықпыз. Қазақта «Хан – шаңырақ, халық – уық» деген де мақал бар. Біз бүкіл халық болып елдің уығындай қадалсақ, аспанға көтеретін шаңырағымыз – Президентіміз, дүйім ел ардақ тұтатын, әлем жұрты құрметтейтін Елбасымыз. Асылды бағалай білетін халық екенімізді міне, жиырма жылдан бері дүниеге танытып келеміз. Сайлау өтсе де, референдум өтсе де халық көңілі баяғыдай. Нұрсұлтан Әбішұлына деген сеніміне селкеу түсіп көрген жоқ. Ел сенімін ақтауды ең қасиетті парызы санайтын Елбасымызға лайықты құрметімізді кездескендегі ізетімізбен, сөйлегендегі сөзімізбен ғана білдіріп қою аздық етеді ендігі жерде.
Осылай болуға тиісті еді. Солай болғанына қуаныштымыз. Осындай шешімнің қабылдануына қатысқанымызды мақтаныш етеміз.
Болат ЖЫЛҚЫШИЕВ, Парламент Сенатының Аграрлық мәселелер және қоршаған ортаны қорғау комитетінің төрағасы.