Былтыр «ЭКСПО-2017» халықаралық көрмесі аясында Баянауылда туризмді дамыту мақсатында «Самрұқ-Қазына» АҚ-ның ұйымдастыруымен «Менің елім» атты кіші бизнес жобалар байқауы өткен-ді. Аудан орталығындағы Ш.Айманов атындағы мектеп-интернат шығармашылық тобы да байқауға қатысып жүлдегер атанды. Шағын грант 1 миллион теңге тұрады. Осы қаржыға 15 велосипед сатып алынды. Сөйтіп «Баянауылда экологиялық велотуризмді ұйымдастыру» жобасын бастап кетті. Мақсат – ауданда велодесант топтарын құрып, экологиялық велотуризмді ұйымдастыру, оқушылар үшін экология, биология, география пәндері бойынша теориялық және практикалық сабақтарды табиғат аясында өткізу. Екіншіден, ауылдықтардың да бос уақыттарын тиімді пайдалану арқылы туризм аумағын қоқыстан тазартып, салауатты өмір салтын ұстану.
– Қазір Баянауылда бәсекеге қабілетті туризм кластерін қалыптастыру үшін көп жұмыстар атқарылуда. Велотуризм шілде-қазан айлары аралығында өтеді,– дейді аудан әкімі Оразгелді Қайыргелдинов. – Сондықтан «Баянауылда экологиялық велотуризмді ұйымдастыру» жобасы ауданда туризмнің дамуына серпін береді деп ойлаймын.
Ал мектеп-интернат директоры Салтанат Досмағамбетованың айтуынша, әлеуметтік кәсіпкерлікті дамыту жобасы бойынша мектеп-интернат оқушыларының бос уақытында жұмыспен қамтуды, еңбекке баулуды ойластырыпты. Жұмысқа 7-9 сыныптың ұл балалары тартылады. Оқушылар Сабындыкөл, Жасыбай көлдерінің жағажайлары, Жасыбай батыр зиратының маңайы, Баянауыл ауылының маңайындағы бұлақтар, ормандарды тазалайды. Велосипедтер мектеп-интернаттың мүлкі есебінде тіркелген. Тау-тасқа ыңғайлы, 8 режімді жылдамдығы бар таулы жерге арналған велосипедтер. Әлеуметтік кәсіпкерлік жобасына мұғалімдер Ержан Рахымтаев, Нұрбол Абдуевтер жетекшілік жасайды. Мектеп-интернат 446 оқушыға білім мен тәрбие беруде 446 оқушының 205-сі интернатта, Баянауылдың шалғай ауылдары Жосалы, Ақши, Егіндібұлақ, Көкдомбақ, Торайғыр, Қаратомар, Белағаш, Жанатілек, Бірінші мамыр және жеке орналасқан бөлімшелер мен фермалардан келген оқушылар оқиды. Қалған 241 бала аудан орталығында өз үйлерінде тұрады.
Тіпті велосипедті жалға алған адамға қоқыс салатын қап беріледі. Велосипед арқылы денсаулығын да шынықтырады, қоқыс қалдықтарын да жинайды. Жалға алу құны сағатына – 500 теңге. Түскен қаражат оқушылардың еңбек ақысына, республикалық «Мектепке жол» акциясы бойынша аз қамтамасыз етілген және көпбалалы отбасылардың балаларына көмек ретінде беріліпті. Шахмат кабинетін жабдықтауға, гимнастика залына жиһаз алуға жұмсалды.
Иә, Баянауыл туризмі керемет-ақ. Бірақ туризмді дамытумен бірге, табиғаттың ластану жағдайы алаңдатады. Экологиялық сана, экологиялық мәдениеттің төмен болуынан демалушылар соңында қоқыс қалдырады.
– Сондықтан, – дейді мектеп директоры Салтанат Досмағамбетова. – «Баянауылда экологиялық велотуризмді ұйымдастыру» атты бизнес-жобамызды «Менің елім» байқауына ұсындық. Біздің мектеп-интернат ұжымы осы жоба арқылы Баянауылда туризмді дамыту мен қоршаған ортаны сақтау мәселесін шешетін жолды ұсынып, үлес қосуда. Адам мен табиғат арасында байланысты орнатудағы жалпы мәдениеттің бір бөлігі ретінде адамды экологиялық мәдениетке тәрбиелеу, таза ауамен тыныстап, денсаулығын нығайту керектігін ұқтырғымыз келеді.
Фарида БЫҚАЙ,
«Егемен Қазақстан»
Павлодар облысы,
Баянауыл ауданы
Суретті түсірген Ержан РАХЫМТАЙ
