Бас хатшының айтуынша, Сириядағы ахуалды толықтай шешу жалғыз БҰҰ-ның қолынан келетін шаруа емес. Ол әсіресе, БҰҰ Қауіпсіздік Кеңесі ортақ шешімге келе алмай жатқанда жағдайдың қиындап кеткенін айтып өтті.
«Сирияда әлемнің түкпір-түкпірінен келген түрлі әскери топтар әрекет етіп жатыр. Онда мүдделер тоғысып, қырғи-қабақ соғыстың өрті тұтанды. Шейіттер мен сүнниттер қырқысып, аймақты бөліктерге бөліп тастады. БҰҰ-ның таңғажайып жолмен бүкіл мәселені шешіп тастауына сену тым аңғырттық болар еді», деді А.Гутерриш.
Сонымен қатар БҰҰ Бас хатшысы таяуда АҚШ тарапы Сирияға жасаған әуе шабуылы жөнінде де өз пікірін білдіріп, қырғи-қабақ соғыстың қайта басталғанын, алайда қазіргі жағдайдың бұрынғыдан өзгеше екенін айтып өткен.
«Бұрын шиеленіс АҚШ пен КСРО арасында болған еді. Қазіргі таңда АҚШ пен Ресей бұрынғыдай бәрін бақылауда ұстай алмайды. Түркия, Иран, Сауд Арабиясы секілді көптеген елдер аймақта белсенділік танытып жатыр. Қырғи-қабақ соғысы кезінде келіссөз жүргізуге, бақылауға және байланыс орнатуға, тіпті оқиға шиеленісіп кеткенде де оны шектен шығармауға мүмкіндік болатын. Қазір ондай құрал жоқ. Сондықтан ондағы ахуал тым күрделі», деді А.Гутерриш.
Дегенмен Бас хатшы Сириядағы ахуалдың тұрақтануынан әлі үмітті екенін жеткізді. Оның пайымдауынша, алдағы уақытта аймақтағы түйткілдің шешімі табылуы тиіс. Әлемде бейбітшілік пен қауіпсіздік орнату үшін барлық тарап ортақ келісімге келуі қажет. Сондай-ақ А.Гутерриш БҰҰ Қауіпсіздік Кеңесіндегі келіспеушілікке наразы екенін атап өтті.
Ауғанстанда қайтыс болғандар саны 63-ке жетті
Ауғанстан астанасы Кабулдағы және Бағлан провинциясындағы террористік шабуылдан қайтыс болғандар саны артып келеді.
Дауыс беру учаскелеріндегі жарылыстан қаза тапқандар саны 63-ке жуықтап, жүздеген адам жарақат алған. Әуелі Кабулдегі куәлік беру мекемесінде жанкешті өзіндегі бомбаны жарып жіберген. Соның салдарынан 57 адам мерт болған. Кейінірек Бағлан провинциясында бомба тиелген жүк көлігі дауыс беру учаскесіне барып соғылған. Онда қайтыс болғандар саны алтыға жетіпті.
Al Jazeera арнасының мәліметіне сүйенсек, ИЛИМ/ДАИШ ұйымы Кабулдағы террористік шабуылды өз мойнына алған. Әзірге Бағландағы оқиғаны кім ұйымдастырғаны белгісіз. Арнаның хабарлауынша, Кабулдағы жарылыс кезінде көптеген балалар мен әйелдер қаза тапқан көрінеді.
Associated Press агенттігіне сұхбат берген қоғамдық денсаулық министрінің өкілі Вахид Маджроның айтуынша, оқиға орнында 21 әйел, 5 бала мерт болған. Ол қаза тапқандар саны көбеюі де мүмкін екенін жеткізді.
Айта кету керек, биылғы қазанда Ауғанстанда парламенттік сайлау өтеді. Кабулдағы жарылыс – дауыс беруге қарсы жасалып отырған төртінші шабуыл.
Армения премьер-министрі отставкаға кетті
Армения премьер-министрі Серж Саргсян елдегі бірнеше күнге созылған наразылық шеруінен кейін қызметтен кетті. Бұл туралы премьер-министрдің ресми сайты мәлімдеді.
«Никол Пашиняндікі (қарсылық акциясының жетекшісі ред.) дұрыс, менікі қате болды. Болған оқиғадан шығатын бірнеше жол бар, алайда мен оның бірде-біріне бармаймын. Бұл маған лайық емес. Мен мемлекет басшысы қызметінен, яғни премьер-министрліктен бас тартамын. Сіздердің талаптарыңызды орындаймын. Елімізге бейбітшілік тілеймін», делінген сайтта жарияланған мәлімдемеде.
Таяуда С.Саргсян премьер-министр болып сайланған еді. Бұл шешімге келіспеген халық жаппай көшеге шығып, наразылығын білдірді. Олар ел астанасы Ереванның орталығына жиналып, үкімет ғимараттарына кіруге кедергі жасаған еді.
Жексенбі күні оппозицияның талабымен Ереванда С.Саргсян және Никол Пашинян арасында келіссөздер жүргізілген болатын. Сол күні Н.Пашинян бастаған бірқатар оппозиция өкілдері тұтқынға алынды. Алайда дүйсенбі күні олар босатылды.
2015 жылы Арменияда конституцияға өзгерістер енгізіліп, ел басқару президенттік биліктен парламенттік жүйеге ауысқан болатын. Соған сәйкес, премьер-министр ел тізгінін ұстайды.
Айта кету керек, С.Саргсян Арменияның президенті қызметін 2008-2018 жылдары атқарды. Ал жақында өткен сайлауда ел президенті болып Армен Саркисян тағайындалды.
Шолуды әзірлеген
Абай АСАНКЕЛДІҰЛЫ,
«Егемен Қазақстан»
