Бейбітшілік пен берекенің салтанат құрған тойына Мемлекет басшысы Нұрсұлтан Назарбаев та қатысып, Қазақстан халқының бірлігі күніне арналған мерекелік концертті тамашалады.
«Қазақ елі» монументі алдындағы алаңда Нұрсұлтан Назарбаевты Қазақстан халқы Ассамблеясының этномәдени орталықтарының өкілдері өздерінің ұлттық дәстүрін көрсетіп, ән айтып, би билеп қарсы алды.
Елбасы барша қазақстандықтарды және шараға қатысушыларды мемлекеттік мерекемен құттықтады.
– Баршаңызды ортақ мейрамымыз – Қазақстан халқының бірлігі күнімен құттықтаймын. Бірліктің арқасында біз тәуелсіз мемлекет бола білдік. Біздің бірлігімізді барлық ұлыстар дәріптеп отыр. Бізге әлемнің түкпір-түкпірінен көп ұлтты мемлекетті қалай құру керек екенін үйрену үшін келетіндер бар, – деді Қазақстан Президенті.
Мемлекет басшысы еліміз айтулы жетістіктерге көп ұлтты Қазақстан халқының бірлігі мен достығының арқасында қол жеткізгенін атап өтті.
– Бірлігіміздің арқасында біз озық дамыған 30 елдің қатарына қосылу және халықтың әл-ауқатын арттыру үшін өзімізге жауапкершілік жүктедік. Халқымыздың береке-бірлігінің арқасында мен әрбір қазақстандықтың өмір сүру жағдайын жақсартуға бағытталған «Президенттің бес әлеуметтік бастамасын» жария еттім, – деді Нұрсұлтан Назарбаев.
Елбасы мемлекеттің бүгінгі жетістіктерін елдегі бірлік пен татулықтың жемісі деп бағалай отырып, халықтың әл-ауқатын көтеруге бағытталған бастамалар елдің дамуына серпін беретіндігіне сенім білдірді.
Баршамызға ортақ бақытты қорғай білуіміз керектігін ескерткен Президент, тоталитарлық режім кезінде қазақ даласына бірсыпыра этностардың күшпен көшірілгендігін, алайда жергілікті халық – қазақтың терең құрметінің арқасында олардың аман қалғандығын атап өтті. Бүгінде сол қуғындалған буынның ұрпағы қазақ халқымен қолтықтаса еңсесін көтеріп, мемлекет құруға атсалысып, ел дамуына өз үлестерін қосуда.
Соңында Қазақстан Президенті барша жұртты мерекемен құттықтап, өскелең ұрпақтың болашағының жарқын болуына ниеттестік білдіріп, әр отбасына бақ-береке мен амандық тіледі.
– Біз еліміздегі алуан түрлі мәдениеттердің, барлық тілдер мен дәстүрлердің бәрі де өркендеп келе жатқанын көріп отырмыз. Біз – біртұтас халықпыз, бір-бірімізді құрметтейміз әрі жақсы көреміз, ортақ Конституция мен заңдарға бағынамыз. Бір-бірімізді құрметтеп, достық қарым-қатынаста болу – зор бақыт. Осы бірлігімізді сақтап, бақытымыздың қадірін білейік! – деді Нұрсұлтан Назарбаев.
Елбасының салиқалы саясатының арқасында Қазақстан халқының тілегі де, жүрегі де – бір, мұраты айқын, ортақ мақсатқа ұмтылған жасампаз елге айналды.
Бұл сөздерді Мәжіліске Қазақстан халқы Ассамблеясынан сайланған тоғыз депутаттың бірі – Наринэ Микаелян растай түсті. Ол Қазақстан халқы Ассамблеясы ХХVI сессиясынан алған әсерімен де бөлісіп, барша қазақстандықтарды айтулы мерекемен құттықтады.
– Қазақстан халқы бірлігі күнімен шын жүректен құттықтаймын. Ең ізгі, ең жарқын, барша халықты ұйыстыратын ұлық мереке ынтымақтың киелі бесігі – Астана қаласында ерекше тойланып жатыр. Ұлы Дала елі бүгін ерекше күйге бөленді. Кешегі өткен Ассамблея сессиясы мазмұнды, мағыналы болып, Мемлекет басшысы біздерге тапсырма жүктеді. Енді «Президенттің бес әлеуметтік бастамасын» жүзеге асыруға күш қосып, оны халық арасында насихаттап, заңдық негізін қалыптастыруға үлесімізді аянбаймыз. Халықтың әл-ауқатын көтеруге бағытталған ауқымды бастамалардың қысқа мерзімде әрі сапалы орындалуына мүдделіміз. Осы мақсат бүгінгі мерекенің де шырайын келтіріп тұр. Аспанымыз әрдайым ашық болсын, халықтың әл-ауқаты арта берсін! – деді Н. Микаелян.
Айтулы шараның концерттік бағдарламасы да айрықша болды. Әсем безендірілген сахнаға әр этнос өкілдері өздерінің ұлттық киімдерімен жарқырап шықты.
Қонақтар ең алдымен елордалық ұлттық мәдени бірлестіктердің шығармашылық ұжымдарының, Астана қаласы Мемлекеттік академиялық филармониясы әртістерінің және эстрада жұлдыздарының қатысуымен «Рухани жаңғыру – бірлік пен тұтастық негізі» атты театрландырылған қойылымды тамашалады.
Концерттік бағдарламаны «Турецкий хорының» «Праздник песни» ән кеші жалғастырып, ерлер ұжымымен бірге сахна төрінде «Турецкийдің» SOPRANO әйелдер тобы өнер көрсетті. Одан кейін сахна төрінде Қазақстан халқы Ассамблеясының этномәдени бірлестіктері мерекеге ән-шашуларын арнады.
Концерттен кейін жиналған жұрт спорттық ойындарды тамашалады. «Қазақ елі» монументінің алдындағы алаңда қазақ күресі, арқан тартыс, асық ату, гір тасын көтеру және қол күрес сынды ұлттық спорт түрлерінен жарыстар өткізіліп, оған қала тұрғындары да қатысып, мереке мазмұнын онан сайын байыта түсті.
Мамыражай мамырдың алғашқы күні Астанада мерекелік іс-шаралар көп болды. Түс әлетінде «Бәйтерек» монументінің алдындағы алаңда «Достық шеруі» атты велошеру болды. Сонымен қатар 500 домбырашыдан құралған «Ұлы Дала үні» атты флешмоб ұйымдастырылып, қала тұрғындарына ерекше мерекелік көңіл-күй сыйлады. Бұлардан бөлек қаланың кітапханаларында, музейлерінде, театрларында және басқа да мәдениет мекемелерінде бірлік пен достық мерекесіне арналған тақырыптық көрмелер, қойылымдар мен концерттер өткізілді.
Серік ӘБДІБЕК,
«Егемен Қазақстан»
