Қос матчтан тұратын текетіресте жалпы барлығы 13 гол соғылды. Бұл баяғы «Бавария» мен «Спортингтің» рекордымен тең. Биылғы Чемпиондар лигасында бірінші рет жеңілген «Ливерпуль» «Олимпико» стадионында қатты бір қиындық көрді деп айта алмаймыз. Бірінші таймда 2 гол соғып тастап, төрешінің ақтық ысқырығын күтіп жүрді. Осылайша олар 2007 жылдан бері финалға бірінші рет шығып отыр. «Рома» сапындағы футболшылар тағы бір ерлік жасағысы келіп еді, уақыт шіркін жетпеді. Дегенмен соңғы 5 матч қатарынан гол соққан Эдин Джеконың тегеуріні күллі жанкүйерлердің ризашылығын тудырды.
Финалистер анықталып, болар іс болғаннан соң кім жеңімпаз атануы ықтимал деген сұрақтың төңірегінде тебіреніп көрсек. «Ливерпуль» биылғы Чемпиондар лигасында 46 гол соғыпты. Бұл британиялықтардың шабуылы шаң жұқтырмайды деген сөз. Фирмино мен Салах 10 голдан соқса, соңғы 8 ойында Садио Мане 9 гол тоғытты.
«Реалдың» да көрсеткіштері жаман емес. Өздеріңіз білетіндей, бұл клуб биылғы бәсекеде бірнеше рет рекордтардың мұртын бұзды. Ең көп жеңіске жеткен, қатарынан финалға шыққан деген секілді атақтары жетіп жатыр. Ал бір Криштиану Роналдудың өзі жекелей сында бірнеше рет аты аңызға айналған футболшылардың жетістіктерінен асып түсті. Биылдың өзінде португал футболшысы жалғыз жүріп 15 гол соқты. Мадридтік клуб финалға дейін 12 кездесу өткізді. Оның 8-інде жеңіске жетіп, 2 ойынды тең аяқтап, тек 2-еуінде ғана жеңілді. 30 гол соғып, қақпаларына 15 доп жіберді.
«Ливерпуль» де финалға дейін 12 кездесу өткізді. 7 ойында жеңіс тойлап, 4 матчта тең түсіп, 1 кездесуде жеңіліп қалды. Топтық кезеңнен бастап санағанда 40 гол соғып, қақпасына небәрі 13 доп қана жіберген. Бұл жағынан, әрине «Ливерпульдің» басымдығы сезіледі.
Одан бөлек, қос команданың осы турнирдегі бір-бірімен кездескендегі жағдайлары ше? Бұл тұрғыда да ағылшындардың басымдығы бар. Корольдік клуб пен «мерсисаидтықтар» 5 мәрте кездесіп, соның үшеуінде «Ливерпуль» жеңіске жеткен. Қалған екеуін испандар ұтты. Ал 2008/2009 жылғы Чемпиондар лигасының 1/8 финалында Рафаель Бенитес шәкірттері «Реалды» «Бернабеуде» 1:0 (Бенаюн), «Энфилдте» 4:0 (Торрес 16, Джеррард 28, 47, Доссена 88) есебімен жеңді. Алайда 2014/2015 жылғы маусымда «Реал» «Ливерпульді» өз алаңында 1:0 (Бензема), «Энфилдте» 3:0 (Роналду 23, Бензема 30, 41) қылып, есесін қайтарды.
Қос команданың да өзіндік ерекшеліктері бар. Дей тұрғанымен, жалпылама алғанда «Ливерпульдің» шабуылы «Реалдыкінен» сәл мықтырақ болғанымен, «Реалдың» да қорғанысы «Ливерпульдікінен» әлдеқайда мықтырақ. Түрлі салыстырмалы жағдайларды келтіргенімен, барлығына нүкте қоятын бір ғана матч. Ол 26 мамыр күні Киевте өтетін финал.
Ермұхамед МӘУЛЕН,
«Егемен Қазақстан»
