Елімізде қол күресінен әлем чемпионаты өтті
Ең ежелгі спорт түрінің бірі – қол күресі әлемдік спорт тілінде армрестлинг деп аталады. Ал Алматыда бірінші рет 30 қараша-3 желтоқсан аралығында қол күресі бойынша әлем чемпионаты өтті. Алдын-ала белгілі болғанындай, бұл сайысқа 47 мемлекеттен 1500 спортшы, мұнан бөлек 200-ге тарта жаттықтырушы мен басқа да бапкерлер қатысты.
Бірден айта кету керек, бұл жарыста әлемдік армрестлинг сайысының 33-ші бас жүлдесін Ресей құрама командасы жеңіп алды. Екінші орын – Қазақстан командасының қанжығасына байланса, үшінші орынды – Украина спортшылары иемденді. Егер дәл осы күндері спортсүйер қауым ақпараттарды ақтарыстырып, сайттарды сүзіп шығар болса, Алматыда өткен әлем чемпионатына қатысқан елдердің бұқаралық ақпарат құралдары өз спортшыларының жетістіктерін жаһанға жар салып, жариялап жатқанын көрген болар еді.
Бұл күндері сайыстың бас жүлдесін жеңіп алған ресейліктердің де, қола жүлде иегерлері украиндықтардың да қуанышында шек жоқ. Олардың бел ортасынан көрінген күміс жүлделі Қазақстан командасы да қол күресінен осал еместігін осы жолы анық көрсетті. Көрші қырғыздардың өзі тоғыз медаль жеңіп алғанын мақтанышпен мәлімдеп отыр.
Әлем чемпионаты алдымен жасөспірімдер, ардагерлер мен мүмкіндігі шектеулі спортшылардың сайысынан басталғанын айта кету керек. Мүмкіндігі шектеулі спортшылар арасындағы сайыстың жай-жапсарын ресейлік армрестлер Руслан Маметовтен артық білетін жан жоқ. Ресей Федерациясының еңбек сіңірген спорт шебері Руслан Маметов – он дүркін әлем чемпионы. Тіпті 11 рет қатарынан Еуропа чемпионатының бас жүлдесін басқаға бермеген білекті спортшы Қазақстандағы әлем чемпионаты жоғары деңгейде өтті деп есептейді.
Керісінше, Әлемдік армрестлинг федерациясының вице-президенті Мұхамедолла Ағзамов бұл сайысты мұнан да жақсы ұйымдастыруға болатын еді деп ойлайды. Себебі, Қазақстан олимпиадалық емес осы спорт түрін қолдауға үлкен қаражат бөлуге асығар емес. Оның айтуынша, қол күресі сайысы Туризм және спорт министрлігі назарына тек екі жыл бұрын ғана іліккен. Алайда, осыған қарамастан, қазақстандық спортшылар армрестлинг бойынша әлемдік көшбасшылар қатарынан көрініп отыр. Қазақстанның тағы бір кемшілігі – қол күресі спорты мүмкіндігі шектеулі жандар, яғни мүгедектер арасында кеңінен тарамаған.
Сонымен, Қазақстан командасының жүлде қоржынына алғашқы алтынды жасөспірімдер арасында Мағжан Шәмиев салды. Жартылай финалда ресейлік қарсыласын еңсерген М.Шәмиев шешуші сайыста словак спортшысынан басым түсті. Жалпы, қазақстандықтардың қоржынында 19 алтын медаль бар.
Сонымен, қол күресінен келесі әлем чемпионаты Бразилияда өтетін болады.
Айнаш ЕСАЛИ.
Алматы.