Жамбыл облыстық тілдерді дамыту басқармасының ұйымдастыруымен мемлекеттік қызмет көрсететін ұйымдардағы қызметкерлер арасында олардың латын әліпбиінде жазу дағдыларын қалыптастыру мақсатында «Латын әліпбиі тілімізге серпін береді» атты жаппай диктант жазу акциясы өтті.
Аталған акцияға «Қазақстан Халық банкі», «Қазпошта» акционерлік қоғамдарының облыстық филиалдары, жергілікті жүйелер телекоммуникациялар торабы, облыстық халыққа қызмет көрсету орталығы, білім беру және денсаулық сақтау саласының қызметкерлерінен құралған 250 адам қатысып, латын әліпбиінде диктант жазды. Диктант жазу акциясы М.Х.Дулати атындағы Тараз мемлекеттік университетінің технологиялық кешенінде өтті.
«Латын графикасына негізделген қазақ тілі әліпбиінде диктант жазу акциясының негізгі мақсаты әрбір азаматтың, әсіресе қызметкерлердің жазу дағдыларын қалыптастыру болды. Аталған акцияны бұдан кейін де жалғастыру жоспарда бар», дейді басқарма басшысы Сұлушаш Құрманбекова.
