Бұған дейін хабарланғандай, 19-20 мамырда еліміздің 8 аймағынан жиналған балалар үйі тәрбиеленушілері арасында Алматыда «Жеңімпаз жолы» атты алғашқы веложарыс өтті. Балалар үйі мен мектеп-интернаттарда тұратын, жетім немесе ата-ана қамқорлығынан айырылған 14-16 жас аралығындағы балалар екі күнде 20 шақырымдық қашықтықты бағындырды.
Жарысты ұйымдастыруға «BAURZHAN Foundation» жеке қоры ұйытқы болды. Қордың жоба жөніндегі үйлестірушісі Шырын Сәрсенбекова жарыстың балалар үйлерінің арасында алғаш рет өткізілгенін баяндай отырып, «Біз алты жыл бойы балалар үйінің тәрбиеленушілерімен қордың басқа да жобалары бойынша спорттық жарыстар ұйымдастырып келеміз. Бірақ веложарыс алғаш рет өткізілді. Бұл жоба арқылы спорттың барлық балаға қолжетімді болуын мақсат етеміз. Ал әлемдегі үздік «Испания Вуэльтасы» гранд-турын өз көздерімен тамашалап, кумирлерімен кездесу балалар үшін өмірлеріндегі естен кетпес сәтке айналары сөзсіз. Бұл болашақтағы үлкен жетістіктердің бастамасы боларына сенеміз», деді.
Биылғы жылы жеңімпаз команда – әлемдік «Испания Вуэльтасы» гранд-турының бірнеше кезеңіне куә болады. Тур де Франс және Джиро д’Италиямен қатар әлемдегі ең беделді үш веложарыстың қатарына кіретін гранд-турды өз көзімен көріп, кумирлерімен кездесу бақытына Қарағанды қаласының «Таңшолпан» командасы ие болды.
«Astana Pro Team» велокомандасының кәсіпқой спортшысы Артём Захаров та жарыс туралы өз ойын білдіріп, балаларға сәттілік тілей келе, «Мен балалар үйіне де велоспорттың қолжетімді бола бастағанына қуаныштымын. Осы жобаның қатысушылары арасынан дарынды балаларды байқауға болады. Алдағы уақытта жақсы кәсіпқой спортшы бола алады деп сенемін. Барлығына сәттілік тілеймін!» деді.
Жарыс қорытындысы бойынша Қарағанды қаласының «Таңшолпан» командасы, ал жекелей есеп бойынша таңшолпандық Виталий Щелкушкин межеге бірінші жетіп, жарыстың көшбасшысы атанды.
Айнаш ЕСАЛИ,
«Егемен Қазақстан»
АЛМАТЫ
