– Жаңа идеяларды жас ұрпақ әкелетінін әрдайым естен шығармауымыз қажет. Жастардың жалыны мен дарынында ғаламат күш-қуат бар екенін жақсы білеміз. Сіздердің бойыңызда бар білім, іскерлік пен тапқырлық, бастамашылдық пен жаңашылдық біздің еліміздің баянды болашағы үшін өте қажет екенін естен шығармаңыздар.
Алаш арысы Әлихан Бөкейханов айтқандай: «Бөтен кісі қазаққа ешқайдан ештеңе жақсылық әкеп бермейді». Осы орайда, менің айтарым: жарқын болашақ – сіздердің қолдарыңызда.
Қазақ жастары білімге өте зерек және тым ерекше дарынды болып келеді. Жастарға айтарым: батылдықпен алға ұмтылыңыздар, жарқын болашақтың кілті өз қолдарыңызда, еңселеріңізді тік ұстап, әрдайым дем беретін асқақ рухтан ажырамау керек.
Ең бастысы – еңбек. Қай кезде де, алдымен кәсіби біліктілік пен қажырлы еңбек қажет болады. Келешектің экономикасы мен саясатында жалқау, енжар, білімі таяз адамдарға орын болмайды. Бұл да уақыттың талабы.
Өз халқының тарихын, салт-дәстүрі мен мәдениетін құрметтейтін рухта тәрбиеленген, прогресс пен инновацияға бейім жаңа буын – қазақ жастары түбегейлі рухани жаңғыруды жүзеге асыратын аса қуатты күш және бұл істе шешуші рөл атқаруы тиіс.
