![091211-3](http://old.egemen.kz/2011img/091211-3.jpg)
«Егемен болмай ел болмас, етектен кесіп жең болмас», деген екен бабаларымыз. Міне, сол айтылғандай, егемен болған, ел болған кезден бері оның жылнамасы мен шежіресін қалт жібермей жазып келе жатқан басылым – «Егемен Қазақстан». Тек осы қасиеті үшін де бас басылымның қадыр-қасиеті біздің ұжым мүшелері үшін жоғары деп санаймыз. Егемендік тарихының үшінші онжылдығына аяқ басып отырған сындарлы сәтімізде «Егемен Қазақстан» ел ертеңі – жастардың да күн сайын асыға күтіп оқитын басылымына айнала алатынына ешқандай күмәніміз жоқ.
«Егеменде» жарияланып жүрген материалдардың мазмұны жан-жақтылығымен, әрі тереңдігімен оқырманды баурай біледі. Бүгінгі заманғы журналистикаға қойылатын басты талап – сараптаулар мен талдауларға және салыстыруларға арқа сүйейтін сүйекті материалдар десек, мұндай дүниелер бас басылымның кез келген нөмірінен табылады.
Мен өзім арнаулы білім беретін оқу орнының басшысы болғандықтан, газетте білім беру жүйесіне қатысты жарияланып жүрген материалдарды үнемі қадағалап, оқып жүремін. Сөз жоқ, тәуелсіздіктің 20 жылы ішінде елдің білім беру саласында жаңаша көзқарастар мен критерийлер қалыптасты.
Егемендік талаптарына сәйкес ұлттық тілімізде жаңа оқулықтар жазыла бастады. Рас, алғашқыда кейбір әттеген-айлар мен орашолақтықтар болғанымен, кейін бұл іс бір ізге түсіп келе жатқаны белгілі. Бұл жәйттерді де кезінде «Егеменнің» бетінен оқығанбыз. Енді заңғар басылым жөніндегі ой-пікіріме қоса тәуелсіздік жылдарында Алаш арысы Жаһанша Досмұхамедов атындағы біздің колледж ұжымы да ұлан-ғайыр істерге бастамашы бола білгенін айта кеткім келеді.
Атап айтқанда, біздің оқу орнының базасында оқу бағдарламалары мен мемлекеттік стандарттар әзірленіп, өзіміз тектес республикадағы педагогикалық колледждерге таратылды. Сондай-ақ мұнда 48 арнайы оқулық жазылып, республиканың Білім министрлігі тарапынан қолдау тапты. «Білім негізі – бастауышта». Міне, осындай бастауыш білім беру ісінің кейбір толғағы жеткен мәселелері егемендіктің алғашқы жылдарында бас басылым бетінде жарық көргені де аян. Оның ішінде осы жолдар авторының мақаласы да бар еді.
Алдағы 2012 жылы колледждегі жастар мен студенттер бас басылымды жыл бойы рухани тұрғыдан серік етуге ұйғарым жасағаны – бізді сүйсіндіреді. Күні бүгінге дейін арнаулы оқу орнындағы 120 адам «Егемен Қазақстанға» жазылды. Бұл іс одан әрі жалғасуда.
«Егемен» – қай кезде де елдіктің сөзін айтып келе жатқан басылым. Ол бізге сонысымен де қымбат, сонысымен де бағалы.
Шалқыма ҚҰРМАНАЛИНА, Жаһанша Досмұхамедов атындағы педагогикалық колледж директоры, педагогика ғылымдарының докторы.
Орал.