Брифинг барысында Астана әкімі Әсет Исекешев дипломатиялық корпус өкілдерін қала күніне дайындықтың үш топтамасымен таныстырды. Оның айтуынша, бірінші топтамаға Мәдениет және спорт министрлігімен бірлесе жасалған дайындық кірсе, екінші топтамаға Қазақстанның өзге өңірлерімен бірге дайындалған шаралар, ал үшінші топтамаға шетелдік серіктестермен бірлесе өткізілетін іс-шаралар кіреді. Бұл бастамалар Астананы іскерлік және мәдени туризм орталығы ретінде танытуға өз септігін тигізбек.
«Жалпы, жыл бойы өткізілетін мәдени шараларға 1 миллионнан астам адам қатысады деп күтілуде. Сондықтан инженерлік-әлеуметтік инфрақұрылымдарды дайындау, қауіпсіздік пен жайлылықты қамтамасыз ету бойынша барлық дайындық жұмыстары жүргізіліп жатыр», деді ол.
Сондай-ақ тұрғын үй аулаларын, саябақтар мен гүлзарларды, қоғамдық алаңдарды абаттандыру бойынша да ауқымды жұмыстар жүргізілуде. Мәселен, елорда күнінде 100-ден астам, ал жалпы осы жылы 400-ге жуық жаңғыртылған ауланы тапсыру жоспарланып отыр. Олардың басым бөлігі «Рухани жаңғыру» бағдарламасы аясында жеке инвесторлардың қаражатына абаттандырылады деп күтілуде. Ал елорда күніне орай 7 жаңа саябақ пен гүлзар ашылып, 40 мыңнан астам ағаш отырғызылады.
Венера ТҮГЕЛБАЙ,
«Егемен Қазақстан»
