Іріктеуден іркілмеген «Қызыл фурия»
Испания құрамасы үшін 2018 жылғы әлем чемпионатының іріктеу кезеңі сәтті өтті. Хулен Лопетеги шәкірттері «G» тобында сөзсіз көш бастады. Іріктеу кезеңі алдында мамандар Испанияға осы топта екінші орында қалған Италия құрамасы қарсылық көрсетеді деген болжам жасаған-ды. Алайда Пириней түбегінің футболшылары футбол мамандары сәуегейліктерінің быт-шытын шығарды. Он кездесудің тоғызында жеңіске жеткен испандар тек түзде ғана италиялықтармен тең ойнады.
Бүгінде Испания құрамасының асығы алшысынан түсіп тұр. Себебі командада әлемдік деңгейде өнер көрсете алатын Иньеста, Рамос, Сильва, Пике секілді ардагер ойыншылар бар. Бұлардың кез келгені өз шеберліктерінің арқасында ойын тағдырын шеше алады. Бұған дәлел 2008 және 2012 жылы Еуропа чемпионатында, 2010 жылы әлем чемпионатында жеңіске жеткенде нақ осы жігіттер командасын алға жетеледі. Ал бұлардың қатарына Иско, Коста, Васкес, қақпашы Де Хеаның қосылғанын ескерсек, құрама дейгейі анағұрлым жоғары екенін аңғару қиын емес. Оның үстіне биылғы жылғы наурыздың 27-сінде Испания Аргентина футболшыларын 6:1 есебімен ойсырата жеңіп, әлем чемпионатына тек алтын үшін баратындықтарын аңғартқандай болды.
Испания әлем чемпионатының топтық кезеңінде тәжірибелі Португалия, тісқаққан Иран және Марокко құрамаларымен өзара мықтыны анықтайды. «Челси» командасының бас бапкері Жозе Моуриньюның пікірінше, Испания мен Португалия тек «В» тобында ғана емес, жалпы әлем чемпионатында басты фавориттердің бірі. Алайда Испанияның бас жаттықтырушысы Лопетеги мұндай пікірмен келіспейтінін айтты. «Біздің топтағы командалардың осалы жоқ. Португалия Еуро-2016 чемпионы, Марокко Африка құрлығындағы үздік командаларының бірі. Иран болса, Азиядағы мықты әрі іріктеу кезеңінде ең аз гол жіберген құрама. Бұл топта күтпеген есеп тіркелуі әбден мүмкін».
Әрине бұл жерде Лопетеги бапкер «арық сөйлеп, семіз шыққысы» келетін сияқты. Әйтпесе кезінде ойыншы ретінде «Реал» мен «Барселонаның» жейдесін киген бұл бапкер 2011, 2012 жылдары 19 жасқа дейінгі Испания құрамасымен Еуропа чемпионатында екі мәрте, 2013 жылы Испания жастар командасымен де кәрі құрлықтың басты додасында жеңіске жетпес еді ғой. Әліптің артын бағайық.
Сондай-ақ 21 мамырда бас бапкер әлем чемпионатында доп тебетін 23 негізгі футболшының тізімін жариялады. Көптеген белді басылымға құрамаға шақыртылған 23 футболшы емес, оған енбей қалғандардың тізімі қызық болды. Себебі ӘЧ-2018 бармайтын испандық аяқдоп шеберлерін тізбектеп шықсаңыз, «аһ» ұрасыз. Касильяс, Фабрегас, Мата, Торрес, Вилья... жалғасып кете береді. Осы футболшылардың өзі біріншілікте өнер көрсететін көптеген құрама ойыншыларының деңгейінен асып түсері анық. Әйткенмен, чемпиондықтан дәмелі команданың қосалқы құрамы да ұзын-сонар болатыны белгілі. Солай болу керек те.
Әр футболшыға – 800 мың еуродан
Сөз реті келгенде осымен он бесінші мәрте әлемдік додада сынға түсетін Испанияның ішкі чемпионаты – Ла Лиганы да айта кетсек. Әлемдегі ең мықты чемпионаттың бірі Ла Лигада кезінде талай танымал футболшылар – Роналдо, Ривалдо, Зидан, Каннаваро, Фигу доп тепкені белгілі. Бүгінде ФИФА-ның «Ең үздік футболшысы» атағын он жыл бойы өзара бөлісіп келе жатқан Криштану Роналду мен Лионель Месси де осы елде өнер көрсететіні белгілі.
Биыл Чемпиондар лигасында «Реал», Еуропа лигасында «Атлетико» командалары жеңімпаз болғаннан кейін, Испания Корольдік футбол федерациясы «хет-трик» жасаудан үмітті екенін аңғартты. Яғни әлем чемпионатында жеңіске жеткісі келеді. Ол үшін федерация футболшыларға қомақты сыйақы тағайындаған.
«Marca» басылымының жазуынша, егер де Испания ойыншылары сәтті өнер көрсетіп, әлем чемпионатының кубогын басына көтерсе, онда әрбір ойыншы 800 мың еуро сыйақы алады.
Испания алғашқы ойынын 15 маусымда Португалияға қарсы өткізеді. Егер де жеңіске жетіп жатса, онда чемпионаттың 1/8 финалына бір табан жақындай түседі. Ал оларды «А» тобының үздіктері күтіп алады.
Испания құрамасының тізімі:
Қақпашылар: Давид Де Хеа (Манчестер Юнайтед, Англия), Кепа Аррисабалага (Атлетик), Пепе Рейна (Наполи, Италия);
Қорғаушылар: Жорди Альба (Барселона), Сесар Аспиликуэта (Челси, Англия), Даниэль Карвахаль (Реал), Начо Монреаль (Арсенал, Англия), Фернандес Иглесиас Начо (Реал), Альваро Одриосола (Реал Сосьедад), Жерар Пике (Барселона), Серхио Рамос (Реал);
Жартылай қорғаушылар: Иско (Реал), Тиагу Алькантара (Бавария, Германия), Серхио Бускетс (Барселона), Давид Сильва (Манчестер Сити, Англия), Андрес Иньеста (Барселона), Ньигес Сауль (Атлетико), Коке (Атлетико);
Шабуылшылар: Асенсио (Реал), Яго Аспас (Сельта), Диегу Коста (Атлетико), Морено Родриго (Валенсия), Лукас Васкес (Реал).
Алмас МАНАП,
«Егемен Қазақстан»
