![Букер сыйлығының елу жылдығының құрметіне Алтын Букер сыйлығы тағайындалды](/article_photo/1528341429_article_b.jpeg)
Соңғы елу жылдағы үздік бес романды қазылар алқасындағы бес адам саралаған. Олар: жазушы, редактор Роберт Маккрум 1971 жылғы сыйлықтың иегері Видиадхар Найпаулдың «Еркін елде» романын, ақын Лемн Сисей 1987 жылғы жеңімпаз Пенелопа Лайвлидің «Ай барысы» романын, романист Камил Шамси 1992 жылы Букер сыйлығына лайық болған Майкл Ондатженің «Ағылшын пациент» романын, романист, тележүргізуші Саймон Майо Хилари Мантелдің 2009 жылы үздік деп танылған «Арлан алаңы» романын және ақын Холли Макниш былтырғы жеңімпаз Джордж Сондерстің «Бардодағы Линкольн» романын үздік деп тапқан.
Букер сыйлығы қорының басшысы, баронесса Хелена Кеннедидің пікірінше, бұл қысқа тізім Букер сыйлығының ең үздік көркем шығармаға берілетінін айғақтайды. Осы тізімнің ішінен жеңімпаз сыйлықтың веб-сайтында 26 мамыр мен 25 маусым аралығында дауыс беру арқылы анықталады. Жеңімпазды Букер сыйлығының елу жылдығына арналған 6-8 шілде аралығында Лондонда өтетін жабық фестивальда жариялайды. Алтын Букердің иегері кім боларын Астана күнінде білетін боламыз.
Халықаралық Букер сыйлығы 2005 жылдан бастап Букер сыйлығына қосымша ретінде бөлек сыйлық болып табысталып келеді.Сыйлық ағылшын тіліне аударылып, Британияда жарық көрген романдарға беріледі.
2018 жылғы маусымның үздік жазушысы Лондондағы Виктория мен Альберт музейінде анықталды. Поляк жазушысы, ақыны Ольга Токарчук сыйлық лауреаты атанды. «Бегуны» романын ағылшын тіліне аударған – Дженнифер Крофт. Сыйлықтың шарты бойыншы 67 мың АҚШ доллары болатын сыйақы автор мен аудармашының арасында теңдей бөлінеді.
Ольга Токарчук Польшада танымал, бірнеше бестселлердің авторы. Халықаралық Букер сыйлығын алған тұңғыш поляк жазушысы болып отыр. Варшава университетінде психолог мамандығын алған Ольганың шығармашылғына Юнгтың әсері байқалады. Алғашқы өлеңдер жинағы 1989 жылы жарық көрген. Осы күні 8 романның, 2 әңгімелер жинағының авторы. Жазушылықпен қоса жыл сайын өзі тұратын төменгі Силезияда әдеби бутик фестивалін ұйымдастырады.
Аудармашы Дженнифер Крофт поляк, украин, испан тілдерінен еркін аударма жасайды. Көркем аударма мамандығы бойынша Айова штатының университетін тәмамдаған.
Дайындаған Бағашар ТҰРСЫНБАЙҰЛЫ,
«Егемен Қазақстан»