Жиын барысында ол әлеуметтік желідегі желдей ескен кейбір ақпараттардың шындыққа жанаспайтынын алға тартып, осы ретте денсаулық сақтау саласының мамандары сенімді мәліметтерді беріп отыратынын тілге тиек етті.
«Бүгінгі мағлұматтар бойынша менингококк инфекциясының ахуалы төмендеді. Он жетінші аптадағы жағдай анағұрлым асқынып, бір аптаның өзінде республика бойынша 15 жағдай тіркелсе, Алматы қаласында 13 жағдай орын алса, қазіргі таңда оның барлығы артта қалды. Себебі бәрімізді қуантатын жағдай Алматы қаласында осы төрт тәуліктің ішінде менингококк инфекциясын жұқтырған адам тіркелмеген. Сонымен қатар қазір республика бойынша 24 адам, Алматы қаласы бойынша 12 адам емделу үстінде екенін атап өткім келеді. Сондай-ақ 3 бала жансақтау бөлімінде, олардың 1-і Алматы облысында, 2-і Астана қаласында. Ал Алматы қаласында жансақтау бөлімінде жатқан науқас жоқ. Және де тұрғындар үшін дер кезінде керекті ақпарат беру үшін біз облыс орталықтарындағы денсаулық сақтау саласына қарасты бірыңғай байланыс орындарынан тікелей жедел желі жұмысын іске қостық. Тек қана бір тәуліктің ішінде менингококк инфекциясынан емделу, сақтану жолдарын сұрап тұрғындар тарапынан 4500-дей, ал тікелей жедел желі жұмысын бастағалы 8000-дай телефон қоңырауы келіп түсті. Осыдан-ақ тұрғындардың сақтық шараларына мән бере бастағанын байқауға болады. Осы орайда айта кететін тағы бір жайт, 5-6 маусым күндері Алматы қаласының инфекциялық ауруханасына 300-дей адам келіп, дәрігерлерден алдын алу шаралары туралы мәліметтер алды. Олардың ешбірінде инфекция белгілері табылмады», деді бас мемлекеттік санитарлық дәрігер.
Сонымен қатар ол лабораториялық зерттеулер нәтижесіне де тоқталып өтті.
«Біз лабораториялық зерттеулер жасай келе, менингококк инфекциясының 3 сиротипін анықтадық. Жалпы, 27 аурудан алған қоздырғыштарды зерттеп, 17-нен А сиротипі, 9-да Б сиротипі, 1-інде ғана С сиротипі анықталды», деді Ж.Бекшин.
Рауан ҚАЙДАР,
«Егемен Қазақстан»
