![Ақмола облысындағы стационар бөлімдерінің 95 пайызы электронды құжатқа көшірілді](/article_photo/1528775667_article_b.jpeg)
Мемлекет басшысы алға қойған міндеттерді жүзеге асыру мақсатында денсаулық сақтау саласын цифрландыру арқылы кешенді медициналық ақпараттандыру жүйесін іске қосу, мобильді қосымшалар мен қазақстандықтарды міндетті медициналық сақтандырумен өзара тығыз байланыстағы электронды денсаулық паспортын пайдалану, ең бастысы медициналық көмек сапасы мен қолжетімділігін арттыру көзделген. Қазіргі таңда Есіл ауданында 25220 адам тіркелсе, аудандық емхананың әр кабинетінде және әйелдер мен балалар консультациясында медициналық ақпараттық жүйе кешені бағдарламасы орнатылған. Осылайша барлық стационар бөліміндегі электронды құжат айналымы 95 пайызға жетіп отыр. Бұл ретте науқас қағазын беру, дәрігерге жазылу және үйге шақыру электронды форматқа көшірілгендігін баса айта кету керек.
Әрбір дәрігердің компьютеріне енгізілген дәрігердің жеке кабинетінде науқасқа қатысты барлық ақпарат жинақталып, бұрынғы қағаз толтыру қысқарып, медициналық қызметкерлердің уақыты үнемделді. Дей тұрғанмен ауылдық медициналық мекемелерде интернет пен арнайы техниканың болмауы себебінен электронды құжат айналымы ақсап отыр. Оның үстіне науқастардың телефонына «DamuMed» гаджетін орнату мәселесі де қиынға соғып отыр. Осыған байланысты амбулаторлық-емхана және стационар бөлімдерінің қызметкерлері еңбек ұжымдарымен кездесулер өткізіп, түсіндіру жұмыстарын жүргізуде. Бүгінгі таңда мұндай «DamuMed» гаджеті 400 адамның байланыс құрылғысына орнатылып, дәрігерге жазылу жағынан өте ыңғайлы екендігін дәлелдеді.
Асқар ТҰРАПБАЙҰЛЫ,
«Егемен Қазақстан»
Ақмола облысы