Жиында Мәдениет және спорт вице-министрі Ақтоты Райымқұлова аталған бағдарлама бойынша өткен жылы атқарылған жұмыстармен таныстырды. «Еліміздің барлық өңірлеріне киелі жерлер бойынша этномәдени экспедициялар ұйымдастырылып, «Қазақстанның жалпыұлттық қасиетті нысандары», «Еліміздің өңірлік қасиетті нысандары» кітаптары және «Қасиетті Қазақстан» энциклопедициясының 1-ші томы жарық көрді. Бұған қоса, тұңғыш рет Қазақстанның киелі жерлерінің жалпыхалықтық тізіміне енген кейбір нысандардың (Қожа Ахмет Ясауи және Қарахан кесенелері) 3D моделі жасалып, Қазақстандағы киелі жерлер туралы 4 ғылыми-көпшілік деректі фильм («Киелі Қазақстан», «Қожа Ахмет Ясауи, Айша Бибі мавзолейлері», «Алтын адам», «Номадтар елі») түсірілді», деді вице-министр. Өткен жылы еліміздегі тарихи маңызы бар, Ясауи, Арыстанбаб кесенелері, Бекет ата, Сисем ата қорымдарының нысандары, Көне Тараз, Көне Түркістан, Отырар, Сауран, Сарайшық қалашықтары, Абай Құнанбайұлы мемориалдық кешені тәрізді танымал киелі орындарға реставрациялық жұмыстар жүргізілген. Бұл бағытта алдағы уақытта да біршама жұмыстар атқару жоспарланып отыр.
«KazakhTourism» ұлттық компаниясының басқарма төрағасы Рашид Күзембаев елдегі туризмнің үлесі өткен жылы 20 пайызға артқанын, оған ЭКСПО-2017 көрмесінің тікелей ықпалы болғанын айтады. Биылғы жылы да көрсеткіш осы шамада болмақ. Астана қаласының 20 жылдығы мерейтойына туристерді тарту мақсатында көптеген іс-шаралар ұйымдастырылады. Сондай-ақ Р.Күзембаев қазақстандықтарға жазғы демалыста Орталық Қазақстанда − Бурабайға, Қарқаралыға, Баянауыл, Ұлытауға, шығыста − Алтайға, Зайсан, Марқакөл, Рахманов бұлақтарына, Алматыда − Шарын, Көлсай, Қайыңды, Алтынемелге, Аралдағы кемелер орнына, Каспийге, Үстіртке, Балқаш пен Алакөлге баруға кеңес береді. Оның айтуынша, туристік әлеуеті бар орындар бойынша жұмыстар жүргізіліп жатыр. «Батыс Еуропа − Батыс Қытай» дәлізі бойындағы 93 қызмет көрсету орталығының құрылысына жер телімдері бөлінген. Қызмет көрсету стандарттары әзірленіп, келесі жылы Ұлытау мен Тамғалытаста визит-орталықтар ашылады деп жоспарлануда.
Еркежан АЙТҚАЗЫ,
«Егемен Қазақстан»
