![Адвокаттық қызмет туралы заң жобасы жетілдірілді](/article_photo/1529300253_article_b.jpeg)
«Адвокаттық қауымдастықтың өтініштері бойынша заң жобаларын талқылау барысында халықаралық ұйымдар мен сарапшылардың пікірлері ескерілді, олар заң жобасын сынға алып, сонымен бірге адвокаттық қызметтің халықаралық стандарттарына қайшы келетін принципті келіспеушіліктер бойынша алаңдаушылық білдірді. Сонымен бірге жобаның көптеген қарама-қайшы жерлері түзетілді, біздің ұсыныстарымыз тыңдалды және талқыланды.
Барлық халықаралық сарапшылар жұмыс тобының отырысына шақырылып, пікірлерін айтты», дейді ол. Нәтижесінде, енгізілген түзетулердің арқасында заңның реттелуінің негізгі қағидалары мен заң ережелерінің мазмұны, тәртіптік комиссиялардың іс-қимыл тәртібі халықаралық стандарттармен үйлестіріліп, адвокаттық ордердің күшін жою сияқты даулы мәселелер шешілген. Сонымен бірге адвокаттық қызмет кепілдіктерінің тізбесі кеңейтілген, осы қызметпен айналысуға арналған лицензияның қолданылуын тоқтата тұру және айыру мәселелері шешілді және олардың аттестациялау тәртібі жақсарған.
Жалпы, жұмыс тобының 50 отырысы өткізіліп, оған осы қызметке қатысты мамандар, республикалық адвокаттар алқасының өкілдері, аумақтық алқалардан адвокаттар қатысқан. Адвокаттық қауымдастықтың өтініштерімен халықаралық ұйымдар мен сарапшылардың қорытындылары келіп түскен. Соның ішінде Халықаралық адвокаттар одағының (Достастықтың) қорытындысы, Халықаралық заңгерлер комиссиясының үндеуі, Еуропа кеңесі сарапшысының сараптамалық қорытындысы, Халықаралық адвокаттар қауымдастығының (IBA) жобаға сараптамалық талдауы, Судьялар мен адвокаттардың тәуелсіздігі бойынша БҰҰ Арнайы баяндамашысының үндеуі, ЕҚЫҰ Демократиялық институттар мен адам құқықтары бюросының (ДИАҚБ) қорытындысы сияқты құжаттар талқылаушыларға ұсынылған.
Құрамына Түркия, Әзербайжан, Албания, Ресей, Молдова, Қырғызстан, Моңғолия, Босния, Татарстан және басқа да елдер адвокаттық қауымдастықтарының өкілдері енген ассоциацияның ұсыныстары да қаралған.
Осындай жұмыстар жүргізілгеннен кейін заң жобасы Парламент Мәжілісінің 2018 жылдың 5 маусымындағы жалпы отырысында екінші рет қаралып, мақұлданған соң Сенаттың қарауына жіберілді.
Дайындаған Жақсыбай САМРАТ,
«Егемен Қазақстан»