![«Ақылды кеніш» жобасы «Алтын Гефест» байқауында үздік атанды](/article_photo/1529643934_article_b.jpeg)
«Жыл жобасы» аталымында «Қашар кенішінің тау-кен көлігі кешенін басқарудың автоматтандырылған жүйесі» атты жұмыс үздік деп танылды. «Ақылды кеніш» жобасы Елбасы Нұрсұлтан Назарбаев қатысқан телекөпірде салтанатты түрде іске қосылған еді.
Жыл сайын «Алтын гефест» ұлттық салалық байқауына 100-ден астам үміткер өтінім білдіреді. Биыл ССКӨБ солардың қатарынан көрінді. «Жыл жобасы» аталымында экономикалық және әлеуметтік әл-ауқатты арттыру мен өндірістік қайта құруды көбейтуге бағытталған әзірлемелер негізге алынады. Бұл орайда «ССКӨБ» АҚ мамандары енгізген инновация – «Қашар кенішінің тау-кен көлігі кешенін басқарудың автоматтандырылған жүйесі» жобасы еш шүбә тудырмады, сол себепті де 2018 жылдың ең үздік жобасы деп танылды.
Жаңа енгізілім Қашар кенішін 4.0 Индустриясы тұжырымдамасына сай дамытуға мүмкіндік береді. Жобаның элементтері тау-кен көлігі кешенін нақты уақытта автоматтандырылған басқару мен диспетчерлендіруді, ГИС, MES және ERP (SAP) жүйелерінің базасында жоспарлаудың біріктірілген орталықтарын, жерсеріктік дәл жайғастыру мен бұрғылау-жару жұмыстарын басқаруды енгізумен байланысты. Нәтижесінде тиімділік көрсеткіштерінің айқындығы мен бақылауы қамтамасыз етілді, қызметкерлер жедел есепке алу, жабдықты қолдану жөніндегі шынайы және толық ақпаратқа 100 пайыз қол жеткізеді.
«Ақылды кеніш» жобасын енгізудің нәтижесінде кәсіпорын өндіретін өнімнің экономикалық тиімділігі артты. Еуразиялық топ бұл технологияны өзінің барлық кен өндіруші кәсіпорындарына енгізетін болады.
– ССКӨБ 4.0 Индустриясы технологияларын енгізуге кірісті. Кәсіпорын техникалық қайта жарақтандыруды белсенді жүргізуде. Бұл ретте экономикалық тиімді жобаларды табысты дамытуға мүмкіндік беретін, осылайша еліміздің тау-кен металлургиялық кешенінің бәсекеге қабілеттілігін нығайтатын ең заманауи технологиялар пайдаланылып жатыр, –деді Соколов-Сарыбай кен-байыту өндірістік бірлестігінің басшысы Береке Мұхаметқалиев.
Цифрландыру бағдарламасы негізінде жүзеге асқан «Ақылды кеніш» жобасы кен алыбындағы еңбекті жеңілдете түседі. Өндірістің бәсекеге қабілеттігі артады.
Нәзира ЖӘРІМБЕТ,
«Егемен Қазақстан»
Қостанай облысы,
Рудный қаласы