Азаматтардың құқықтары мен бостандықтарын қорғаудан бастап, құқық қорғау, төтенше жағдайлардың алдын алу және салдарын жою, түзету мекемелерін басқару тәрізді және басқа да ең өзекті салалардың басын біріктіріп отырған министрліктің алдына қойылған міндет те ауқымды. Осыдан 26 жыл бұрын 23 маусымда құрылған құрылым бүгінде еліміздегі ең ірі министрлік болып отыр.
Ресми деректерге қарағанда, тәуелсіздік жылдарында ішкі істер органдарының 850 қызметкері қызметтік міндеттерін өтеу кезінде, қылмыскерді ұстау кезінде қаза тапқан. Сонымен қатар қызметтік міндеттерін өтеу кезінде полицияның 2320 қызметкері жарақат алған.
Шара қызметтік борышын өтеу кезінде қаза тапқан әріптестерді бір минут үнсіз еске алумен басталды.
Сондай-ақ монумент алдында Ішкі істер министрлігінің жоғары оқу орындарын үздік тәмамдаған түлектерге – лейтенант погондарын табыстау рәсімі де өтті. Қалмұханбет Қасымовтың қолынан алғашқы шенін алғандардың бірі – Наргиз Жақсылықова ІІМ Б.Бейсенов атындағы Қарағанды академиясының түлегі.
– Мен бұл саланы бекерден-бекер таңдаған жоқпын. Мектепте оқып жүргенімде туған ауылымда ауыр қылмыс тіркеліп, ол ашылмай қалды. Ал қылмыскердің қолынан қаза тапқан келіншектің қызын жақсы танитынмын. Осы жағдай маған қатты әсер етті. Құрбымның күйзелісін көріп, мектеп бітірген соң полиция қызметкері болуды ойладым. Сөйтіп елімізде құқықтық тәртіптің сақталуына, қылмыстарды болдырмауға күш салғым келді. Міне, бұл арманыма да жеттім, – дейді жас лейтенант.
Наргиз бүгінде жұмысқа орналасып та үлгерген. Ол Шығыс Қазақстан облыстық ішкі істер басқармасына қарасты Ертіс полиция бөлімінде тергеуші болып қызмет етуде.
Жалпы, биыл ІІМ жоғары оқу орындарын тәмамдаған 1070 түлек лейтенант шенін алып, түгелдей жұмысқа орналастырылған.
Іс-шарадан соң Ішкі істер министрі Қалмұханбет Қасымов министрліктің клубында әріптестерін кәсіби мерекелерімен құттықтап, қызметтерін адал орындауда көзге түскен бірқатар полицейлерді салтанатты жағдайда марапаттап, ізгі тілектерін жеткізді. Биыл ішкі істер саласында ауқымды реформалардың тағы бір легі басталатындығын жеткізді және алдағы құрылымдық өзгерістер жайында баян етті.
Осы күні орталық аппараттың және аумақтық бөліністердің 854 қызметкері қызметтік міндеттерін адал орындағаны үшін марапатталды.
Кеш соңында жиналғандар назарына Алматы қаласы ІІД мен Ұлттық ұлан көркемөнерпаздары даярлаған мерекелік концерт ұсынылды.
Серік ӘБДІБЕК,
«Егемен Қазақстан»
