![151211-12](http://old.egemen.kz/2011img/151211-12.jpg)
Еліміздің Мемлекеттік тәуелсіздігінің 20 жылдығы қарсаңында «Қазақ энциклопедиясы» баспасынан Қазақстан Республикасы Президенті Кеңсесінің бастығы, саяси ғылымдар докторы, профессор Махмұт Қасымбеков жетекшілік еткен шығармашылық топтың әзірлеуімен «Жүректен жеткен жырлар», «Тұлға туралы толғамдар» және «Размышления о Лидере» деп аталатын үш жаңа кітап жарыққа шықты.
«Жүректен жеткен жырлар» жинағына Қазақстан Республикасының Тұңғыш Президенті Нұрсұлтан Әбішұлы Назарбаевқа арналып әр жылдары жазылған поэзия жанрындағы шығармалар енген және онда белгілі қалам шеберлерінен бастап, әуесқой әдебиетшілерге дейінгі 150-ден астам автордың туындылары қамтылған.
«Тұлға туралы толғамдар» мен «Размышления о Лидере» жинақтарына Елбасымыз туралы еліміздің басты мерзімді басылымдары беттерінде әр кездері қазақ және орыс тілдерінде жарық көрген таңдаулы мақалалар мен сұхбаттар енгізілген. Жекелеген материалдар Президент Мұрағатынан алынып, алғаш рет жарияланып отыр.
Аталған кітаптарда әртүрлі жастағы, алуан ұлт пен сан түрлі мамандық өкілдері және бірқатар саяси көзқарастар мен сенім-наным иелері әзірлеген қилы саланы қамтитын мақалаларға орын берілген. Олардың қатарында журналистер, ғалымдар, педагогтар, дәрігерлер, әдебиетшілер, артистер, суретшілер, сәулетшілер, дипломаттар, саясаткерлер, кәсіпкерлер, фермерлер, мемлекеттік қызметшілер, партиялар мен қоғамдық бірлестіктердің жетекшілері, соғыс және еңбек ардагерлері, оқушы жастар өкілдері, яғни іс жүзінде біздің қоғамымыздың әлеуметтік құрылымының барлық спектрі бар. Бұл пікірлердің құндылығы оны айтқан адамдардың осы оқиғаларды өз көздерімен көріп, көбіне солардың тікелей қатысушылары болып табылатындығында дер едік.
Тарихи оқиғаларды қалпына келтіруде замандастардың өз аузымен берген, тіпті қысқа әрі атүсті куәліктерінің өзі кейде біткен іс туралы тәптіштей жасалған жүйелеу мен иландыратын баяндауларға қарағанда әлдеқайда үлкен ақпараттық маңызға ие болып табылатындығы ғылымға жақсы белгілі.
Кітаптың мазмұны ілгерілеу хронологиясы бойынша – 1991 жылдың соңынан бүгінгі күнге дейін түзілгенін әрі әр материалдың республика дамуының белгілі бір кезеңінде қалыптасқан жағдайдың өзіндік бір үндес «кесіндісі» болып табылатынын айта кету керек. Мұның өзі елдің эволюциясын динамикалы түрде бақылауға әрі оның алдында тұрған міндеттердің мәнін және ол міндеттердің қандай жолдармен, қандай әдістермен шешіліп отырғанын ретроспективті түрде қарауға мүмкіндік береді. Оқырман Н.Ә.Назарбаевтың саяси көшбасшылық тарихының төркініне осы арнада зер салуға және беделдің, бүкілхалықтық сенім мен халықаралық танылудың бір күнде ғана келе қоймайтынына, ол Отан игілігі үшін күн сайынғы және қажырлы еңбектің заңды нәтижесі екендігіне көптеген мысалдардың негізінде көз жеткізуге мүмкіндік алады.
Алайда, аталған кітаптардың ең басты құндылығы бір кезде көңіл қалауымен, жүрек әмірімен айтылған бұл үнқосулар Президент туралы сөз деген үлкен ұғымға ұласып, онда біздің еліміздің алуан қырлы бейнесінің – біздің арманымыздың, біздің Тәуелсіздігіміздің алып полотносы шынайы әрі айқын сомдағандығы болып табылады.
Кітаптар көпшілік оқырман қауымға арналған.
«Егемен-ақпарат».