![Әйелдер арасында танымал болған туындылар](/article_photo/1529991816_article_b.jpeg)
1. Тізімнің көш басында танымал психолог Михаил Лабковскийдің «Хочу и буду» атты кітабы тұр. Автор кез келген адам баласының бақытты болуға әрі қалаған ісімен айналысуға құқылы екеніне кәміл сенеді. Аталған еңбекте өзіңді түсіну, қуана білу, айналадағылармен жарасымды өмір сүру жайы айтылады. Сонымен бірге бізге мәлім де беймәлім уайым мен үнемі үрейлену, адами қарым-қатынастың негізгі себептерін іздейді. Автордың ойынша, ізденіс пен ынта арқылы адамның өзін, мақсаты бұлдыр өмірін түбегейлі өзгертуге болады. Адамның өз өмір жолын, мақсаттарын, құндылықтарын, әдеп нормаларын, болашақ мамандығы мен тұрмыстық өмір жағдайларын дұрыс қалыптастырудағы тұлғалық дамудың нақты қырларын көрсетіп береді. 35 жылдық тәжірибесі бар Михаил Лабковский Иерусалимде тәртібі қиын балалармен жұмыс істеген.
2. Поп-психология бағытында жазылған көптеген бестселлердің авторы – Луиза Хейдің «21 күнде бақытты болудың толық курсы» атты еңбегі қазақстандық қыз-келіншектер назарынан қалай тыс қалсын?! «Өмір сүру өте қарапайым дүние», деп санайтын автор бақытты сәттерді бағалай білуге үндейді. Автордың дайындық кітабындағы тапсырмалардың дені айна алдындағы жаттығулардан тұрады. 21 күн ішінде ішкі қажыр-қайратты нықтау, шығармашылық әлеуетті арттыру, өзін-өзі бағалай білу, жақсы көру мен рақымды болу, өткен шақтағы ескі реніштерді ұмытып, алға бет алуды үйренесіз. Аталған еңбектің негізгі концепциясы оның 1976 жылы шыққан «Тәніңді сауықтыр» атты кітабынан алынған. Бұл кітап бүгінде 33 елге таралып, әлемнің 25 тіліне аударылған. Дәл осы Луиза құрған әдістеме миллиондаған оқырманның үміт отын қайта жақты.
3. Заманауи қоғам табысты болу культін насихаттайды. Екінің біріне ақылды бол, бай бол, табысты, қысқасы бәрінен артық бол деген ұранға үндейтіні рас. Ал табысты болу мен жақсы өмірге тәуелділік орындалмаған армандар мен жетістіктерді үнемі еске салып тұрады. Шынымен қалай бақытты өмір сүруге болады? Танымал блогер Марк Мэнсон «Пофигизм өнері. Бақытты болудың парадокс тәсілдері» атты кітабында бұл сұрақтың соны жауабын көрсетіп береді. Әзіл-шыны аралас жазылған еңбек қарапайымдылық пен шынайылыққа, әр адамның тұлғалық ерекшелігіне мән беруге құрылған. Өмірде бақытты болғыңыз келсе, бар болғаны қолды бір сілтеуді үйренсеңіз болғаны, дейді автор.
Ая ӨМІРТАЙ,
«Егемен Қазақстан»