Туризм және спорт министрлігінде туризм және спорт салаларының қызметкерлеріне мемлекеттік наградалар мен мерейтойлық медальдарды салтанатты табыстау рәсімі болып өтті.
Ел Тәуелсіздігінің 20 жылдығын мерекелеуге орай өткен кеңейтілген жиынға Туризм және спорт министрі Талғат Ермегияев төрағалық етті.
Өзінің құттықтау сөзінде министр туризм және спорт салаларының барлық өкілдерін еліміздің Тәуелсіздік күнімен құттықтады және еліміздің оң жетістіктерін айта келе, оған туризм және спорт саласы қызметкерлерінің қосқан үлесін атап өтті.
Салтанатты жиында Т. Ермегияев мемлекеттік наградалар мен мерейтойлық медальдарды табыс етті.
«Құрмет» орденімен спорт саласының бес өкілі марапатталды, оның ішінде 10 жылда әлемнің 8000 метрден биік шыңдарына 14 рет шығып үлгерген қазақстандық альпинист, Қазақстан Республикасының альпинизмнен спорт шебері, елімізде альпинизм бойынша өткен біріншіліктердің бірнеше дүркін чемпионы және жүлдегері, 2010 жылдың қорытындысы бойынша Қазақстанның жоғары санатты қазіргі чемпионы, ТМД альпинизмінің ашық чемпионатының бірнеше дүркін чемпионы және жүлдегері Мақсұт Жұмаев бар.
Бес адам «Ерен еңбегі үшін» медалімен марапатталды, оның ішінде халықаралық гроссмейстер, Қазақстан Республикасының еңбек сіңірген жаттықтырушысы Болат Асанов, министрліктің Спорт істері жөніндегі комитетінің «Ұлттық штаттық командалар және спорт резерві дирекциясы» РМҚК шорт-тректен бас жаттықтырушысы Мәдіғали Қарсыбеков болса, «Қазақстанның еңбек сіңірген қайраткері» құрметті атағы «Қажымұқан Мұңайтпасұлы атындағы Спортта дарынды балаларға арналған республикалық мектеп-интернат» ММ директоры Серік Түкеевке табысталды.
Бүгінде республикалық мәдени орталықтың басында отырғандар – іскер адамдар. Шелектегі қазақ-ұйғыр мектебіне ұйғыр мәдениет орталығынан 500 мың теңге жәрдемпұл бөлінді. Бұдан басқа Панфилов, Еңбекшіқазақ, Ұйғыр аудандарындағы, Алматы қаласындағы бірнеше ұйғыр мектебіне қолынан келгенше көмектесті. Мәселен, Панфилов ауданы 80 жылдығын атап өткенде мәдениет орталығы ардагерлерге арнап 2-3 көлік сыйлады. Олар қандай да бір шара болса, жұмылған жұдырықша кірісіп кетеді. Сондай-ақ ұйғыр жастарын грант есебінен жоғары оқу орнына түсіру жағына да көңіл бөлуде. Мәдени бірлестіктер бұл істі атқаруда жергілікті атқарушы билік өкілдерімен, «Қазақ тілі» қоғамымен тығыз байланыс орнатып, тіл табысып келеді. Демек, мынау қазақтың, мынау ұйғырдың мәселесі деген әңгіме жоқ. Бұл шаруалар бәрімізге ортақ.
Тағы бір айта кететін жәйт, Ассамблея басшылары Қазақстанда тұратын әрбір ұлт өкілдерімен тұрақты түрде жиі кездесулер өткізеді. Мысалы, ҚХА Төрағасының орынбасары Ералы Тоғжанов Алматы қаласы мен осы облыстың Ұйғыр және Панфилов аудандарындағы ұйғыр ұлтының өкілдерімен бір жылда бірнеше кездесу өткізді. Қазақ пен ұйғыр зиялылары қатысқан сондай бір басқосуда өткір мәселелер төңірегінде әңгіме қозғап, кейбір адамдарды мазалаған мәселелерге тұщымды жауап берді.
Ал біздің 1957 жылдан бері үздіксіз шығып келе жатқан «Уйғыр авази» газеті ҚХА-ның негізі қаланған күннен бастап оның тыныс-тіршілігін, атқарған жұмыстарын жүйелі түрде жариялап келеді. Газетіміздің бетінде Ассамблеяның қол жеткізген табыс-тары мен қызметіне арналған мақалалар көп. Мұнда барлық этномәдени бірлестіктердің тыныс-тіршілігі қамтылады.
Жоғарыда қазақ пен ұйғырдың тату-тәтті тұратын егіз халық екенін айтқан едім. Соған дәлел ретінде мына бір дүниелерді тілге тиек етуді жөн санап отырмын. Өзім қазақтілді ақын-жазушылармен, журналистермен өте жақын доспын. Өмірден озған Камал Смайылов, Қалтай Мұхамеджанов, Тұманбай Молдағалиев сияқты ағалармен, құрдасым Баққожа Мұқаимен сыйлас болғанымды мақтан тұтамын. Сол кісілерден көп нәрсені үйрендім. Кеше Қазақстанның халық жазушысы, ақын Тұманбай Молдағалиев ағамыз өмірден өткенде көңілім қатты құлазыды. Тұмекеңді ақтық сапарға шығарып салған күні газетімізге үлкен материал жаздым. Тіпті, ағалы-інілі болып кеткендіктен бе, ердің жасы – елуге келгенімде Тұманбай ағам маған әзіл-шыны аралас өлең арнаған болатын. Оның бір шумағында:
Бұл өзі биік ұйғыр, аспан ұйғыр,
Үйренген тәрбиеге жастан ұйғыр.
Шерлерін Тұманбайдың сұратпай-ақ
Жыл сайын газетіне басқан ұйғыр...
– деп келетін жері бар. Міне, Тұманбай ағамен рухани жақындастырған сол күндер мен үшін мәңгі естелік іспеттес. Мұндай достық қарым-қатынас Зия Сәмиди мен Сәбит Мұқановтың арасында да болған. Сәбит Мұқановтың «Қашқар қызы» пьесасының ұйғыр театрында ұйғыр тіліне аударылып сахналануына Зия Сәмиди көп еңбек сіңірген екен. Сондай-ақ композиторлар Құддыс Қожамияров пен Еркеғали Рахмадиев, академиктер Хожахмет Садуақасов пен Әбдуәли Қайдардың, жазушылар Хизмет Абдуллин мен Қуандық Шаңғытбаев, Шайым Шаваев пен Бақытжан Момышұлының адал достықты бағалай білген жандар екенін білеміз. Еліміз Тәуелсіздігінің 20 жылдығын тойлау үстінде. Бұл – қазақ халқының ғана емес, Қазақстанда өмір сүретін барлық ұлт өкілдерінің асыға күткен мейрамы. Тәуелсіздік – әрбір азаматтың кеудесіне патриоттық рух беріп, Отанды, елді, жерді сүюге ерекше күш-қуат беретін тәтті ұғым. Біз бұл айтулы күнді өз деңгейінде мазмұнды әрі мағыналы түрде атап өтуіміз керек. Осы леппен алда келе жатқан Парламент сайлауына да бір кісідей атсалыссақ деймін. Елбасының өзі: «Демократиялық қоғамда Парламент кемінде екі партиялы болуы тиіс», деген болатын. Сондықтан да Тәуелсіздіктің айшықтарын ажарландыра түсеміз десек, бәріміз демократиялық сайлаудың ойдағыдай өтуіне өз үлесімізді қосайық. Дастан КЕНЖАЛИН. Алматы.
