![«Нұр Сұңқар» республикалық байқауының жеңімпаздары марапатталды](/article_photo/1530106936_article_b.jpeg)
Аталған байқау биыл тоғызыншы рет ұйымдастырылып отыр. Жыл өткен сайын оның аясы кеңейіп, беделі де артып келеді. Биыл байқауға еліміз бойынша 200-ге жуық қатысушыдан 800-ден астам жұмыс келіп түсті. Оның 85 пайызға жуығы мемлекеттік тілде екенін де ерекше атап өткен жөн.
Биылғы байқаудың тағы бір ерекшелігі ретінде бұрынғыдай тек партияның қызметін насихаттаған журналистерге ғана емес, еліміздегі экономикалық, саяси, әлеуметтік және рухани жаңғыруды, елордамыздың 20 жылдық мерейтойын және «Президенттің бес әлеуметтік бастамасын» насихаттауға белсенді қатысқан тілшілер қауымының да марапатталғанын айта кеткен жөн.
Салтанатты жиынды ашқан Мәулен Әшімбаев «Нұр Сұңқар» байқаудың журналистер арасындағы бәсекелестіктің күшеюіне және отандық журналистиканың жан-жақты дамуына тигізген оң әсерін атап өтті. Сондай-ақ партия Төрағасының Бірінші орынбасары журналистердің қоғамдағы орны ерекше екеніне де назар аударды.
– Қазіргі кезде кез келген қоғам үшін ақпараттың алар орны ерекше. Өйткені ақпараттың дамуға, заман көшіне ілесуге тигізер әсері зор. Сол себепті де бүгінде журналистер қауымына жүктеліп отырған міндеттің мәні мен маңызы артып, салмағы да ауырлай түсті. Еліміздің кез келген жетістігі мен бағындырған биіктерін халыққа алғаш болып тарататын да сіздерсіздер. Келешекте бұдан да биік белестерді бағындырып, ойға алған мақсат-мұраттарыңызға жетулеріңізге тілектеспін. Сол жолда мықты денсаулық, қажымас қайрат және сарқылмас шабыт тілеймін, – деді Мәулен Әшімбаев.
Сонымен қатар партия Төрағасының Бірінші орынбасары алдағы уақытта да партия мен бұқаралық ақпарат құралдары арасындағы байланыс одан әрі нығайып, екі тараптың ел мүддесі жолында бірлесіп жұмыс істейтініне сенім білдірді.
Биыл қатысушылардан елдің саяси, экономикалық, рухани және әлеуметтік жаңғыруы, Президенттің бес әлеуметтік бастамасы, Елбасы – «Нұр Отан» партиясының Төрағасы Нұрсұлтан Назарбаев белгілеп берген өзекті мәселелердің іске асырылу барысын насихаттайтын еңбектер қабылданды. Сондай-ақ партия қызметін жаңғырту, Мәжілістегі және барлық деңгейдегі мәслихаттағы партия фракцияларының жұмысы мен жаңа партиялық жобаларды дәріптеп, «Нұр Отан» партиясының жастар саясатын жандандыру мақсатында атқарған істерін халыққа жеткізуде белсенділік танытқан журналистер қатысты.
Нәтижесінде елімізге танымал қоғам қайраткерлері мен отандық журналистиканы өрге сүйреген белгілі тұлғалардан құралған Байқау комиссиясы «Көзқарас» (ең үздік телевизиялық журналист), «Халық дауысы» (ең үздік телевизиялық журналист), «Сөз шебері» (газеттің үздік журналисі), «Сөз зергері» (газеттің ең үздік журналисі), «Медиа-профи» (интернет басылымның ең үздік журналисі), «Партиялық жаңғыру» (жаңа партиялық жобалар туралы үздік материал), «Астанаға 20 жыл» (елорданың 20 жылдығына арналған үздік материал), «Рухани жаңғыру» (қоғамдық сананы жаңғырту бағдарламасын ілгерілетуге қосқан үлесі үшін), «5 бастама» (Мемлекет басшысының әлеуметтік бастамаларын насихаттауда белсенділік танытқаны үшін) және «Майталман» (отандық журналистиканы дамытуға қосқан үлесі үшін) аталымдары бойынша жеңімпаздарды анықтады. Осы ретте «Партиялық жаңғыру», «Астанаға 20 жыл», «Рухани жаңғыру», «5 бастама» және «Майталман» аталымдары бойынша сыйлықтар биыл алғаш рет беріліп отырғанын атап өткен жөн.
«Нұр Сұңқар – 2018» байқауының жеңімпаздары:
Тимур ҚАЗАҒҰЛОВ, «Акцент» Қостанай облысы Лисаков қалалық телеарнасының бас редакторы, ең үздік телевизиялық журналист – «Көзқарас» аталымы;
Индира АСАНОВА, «Қазақстан» ұлттық телеарнасының аналитик-редакторы, ең үздік телевизиялық журналист – «Халық дауысы» аталымы;
Сейфолла ШАЙЫНҒАЗЫ, «Егемен Қазақстан» газеті бас редакторының орынбасары, үздік газет журналисі – «Сөз зергері» аталымы;
Айжан ШАУҚҰЛОВА, «Актюбинский вестник» Ақтөбе облыстық қоғамдық-саяси газетінің корреспонденті, үздік газет журналисі – «Сөз шебері» аталымы;
Николай ЭНЕЛАНЕ, Informburo.kz ақпараттық-талдамалық порталының арнайы корреспонденті, интернет басылымның ең үздік журналисі – «Медиа-профи» аталымы;
Шалқар ҚОЖАЕВ, «Хабар 24» телеарнасының шеф-редакторы, Мемлекет басшысының әлеуметтік бастамаларын насихаттауда белсенділік танытқаны үшін – «5 бастама» аталымы;
Екатерина БЕСКОРСАЯ, «Казахстанская правда» газетінің Павлодар облысындағы меншікті тілшісі, жаңа партиялық жобалар туралы үздік материал – «Партиялық жаңғыру» аталымы;
«Астана ақшамы» газетінің редакциясы, елорданың 20 жылдығына арналған үздік материал – «Астанаға 20 жыл» аталымы;
Дархан ҚЫДЫРӘЛІ, «Хабар» телеарнасының «Болашаққа бағдар» бағдарламасының жүргізушісі және бағдарламаның шығармашылық ұжымы, қоғамдық сананы жаңғырту бағдарламасын ілгерілетуге қосқан үлесі үшін – «Рухани жаңғыру» аталымы;
Сұлтан ОРАЗАЛЫ, журналист, жазушы, теледраматург, Халықаралық телевизия және радио академиясының академигі, отандық журналистиканы дамытуға қосқан үлесі үшін – «Майталман» аталымы.
Мәдина ЖӘЛЕЛҚЫЗЫ,
«Егемен Қазақстан»