Кеше Қазақстан Республикасы Парламенті Мәжілісінде ел Тәуелсіздігінің жиырма жылдық мерейтойына арналған салтанатты жиналыс өтті, деп хабарлады Мәжілістің баспасөз қызметі.
Қазақстан Республикасының Президенті Нұрсұлтан Назарбаевтың Жарлығымен мемлекеттік және қоғамдық қызметтегі еңбегі, елдің әлеуметтік-экономикалық және мәдени дамуына, халықтар арасындағы достық пен ынтымақтастықты нығайтуға қосқан елеулі үлесі үшін Қазақстан Республикасы Парламенті Мәжілісі төртінші шақырылымының бірқатар депутаттарына жоғары отандық наградаларды Мемлекеттік хатшы Қанат Саудабаев тапсырды.
Ол парламентшілерге: «Өте қысқа мерзімде еліміз ғасырға татырлық жолдан өтті. Елбасымыз Қазақстанды әлемге танытты. Қазақстан халқы осынау 20 жылда жоғары еңбек үлгісін көрсетіп, Мемлекет басшысының жанына тығыз топтасты. Оның үлкен мақсаты мен өршіл мұратын жүзеге асыру жолында жұртымыз жанқиярлықпен, жасампаздықпен еңбек етті. Сіздер де Елбасымызбен бірге осынау ұлан-ғайыр іске өз үлестеріңізді қостыңыздар. Мәжіліс төрт жарым жылдың ішінде 525 заң жобасын қабылдап, Сенатқа жолдады, оның ішінде 493 заңға Президент қол қойды. Қол қойылған заңдардың бір парасы әлем экономикасы дағдарысқа ұшыраған кезеңдегі қиын жағдайдан шығуға үлкен ықпал етті. Депутаттар экономикамызға қажетті заңдарды дер кезінде қабылдап, Үкіметтің дағдарысқа қарсы пәрменді шаралар қолдануына мүмкіндік жасады. Қабылданған заң жобалары ішінде еліміздің ішкі-сыртқы саясатына байланысты аса маңызды, стратегиялық мәні зор құжаттар да бар. Мәселен, былтырғы жылы ғана сіздер Кеден одағына қатысты 30-дан астам заң жобасын бір айдың ішінде, шұғыл түрде қабылдадыңыздар. Тәуелсіздігіміздің 20 жылдық мерекесіне осындай толайым табыстармен келіп отырсыздар», – деді.
Содан кейін Мемлекеттік хатшы Гүлжан Қарағұсоваға II дәрежелі «Барыс» орденін, Сейітсұлтан Әйімбетов, Зағипа Балиева, Виктор Киянский, Дауылбай Құсайынов, Ромин Мәдинов, Уәли Құрманғалиға «Парасат» орденін, Владимир Бобровқа ІІ дәрежелі «Достық» орденін тапсырды.
Сонымен қатар, Майра Айсина, Жақып Асанов, Светлана Бычкова, Уәлихан Қалижанов, Уәлихан Қоңырбаев, Шавхат Өтемісов, Айгүл Соловьеваға «Құрмет» орденімен қоса, «Қазақстан Республикасының Тәуелсіздігіне – 20 жыл» мерекелік медалін тапсырды.
Қ.Саудабаев Қазақстан Республикасы Парламенті Мәжілісі төртінші шақырылымының бірқатар депутаттарына да «Қазақстан Республикасының Тәуелсіздігіне – 20 жыл» мерекелік медалін табыстады.
Мемлекеттік хатшы Мәжіліс Аппаратының бөлім меңгерушісі Нәркес Тілеухан мен Мәжіліс Аппараты бөлім меңгерушісінің орынбасары Сәтбек Шалбаевқа «Құрмет» орденін, Мәжіліс Аппараты басшысының орынбасары Арай Оразовқа «Ерен еңбегі үшін» медалін, Мәжіліс Аппаратының бөлім меңгерушісі Патима Қиясбаеваға Қазақстан Республикасының Құрмет грамотасын және Қазақстан Республикасы Парламенті Мәжілісі Аппаратының басшысы Ерген Дошаевқа «Қазақстан Республикасының Тәуелсіздігіне – 20 жыл» мерекелік медалін тапсырды.
* * *
Сондай-ақ, Қазақстан Республикасы Парламенті Мәжілісінің Аппарат басшысы Ерген Дошаев палата қызметкерлерін ел Тәуелсіздігінің 20 жылдық мерейтойымен құттықтап, салтанатты жиналыс өткізді. Бірқатар Парламент қызметкерлерін мерекелік медальмен марапаттап, Аппарат қызметкерлерінің бір тобына мемлекеттік тұрғын үйден бөлінген пәтерлердің құжаттарын тапсырды. Сонымен қатар, Мәжілістің қызметін қамтамасыз етуге қосқан үлесі мен белсенді еңбегі үшін Парламент қызметкерлерінің тағы бірқатарына алғыс жарияланды.