Бизнес-форумда сөз сөйлеген Қазақстан Республикасы Премьер-Министрінің бірінші орынбасары Асқар Мамин екі ел арасындағы тауар айналымының әлеуетін АҚШ-тың 1 миллиард долларына жеткізу мүмкіндігі бар екендігін атап өтті. «Мемлекет басшысы Татарстанға биылғы маусым айындағы сапары барысында осындай тапсырма берді», деді А.Мамин.
2017 жылы Қазақстан мен Татарстан арасындағы сауда айналымы 700 млн АҚШ долларына жуықтады. Бұл 2016 жылмен салыстырғанда 1,7 есеге (425,3 млн АҚШ доллары) көп.
Форум аясында ынтымақтастықтың мұнай химиясы, машина жасау, қорғаныс өнеркәсібі, көлік, инновация салаларындағы болашағы талқыланды. Бизнес-форум қорытындысы бойынша тараптар бірлескен жобаларды жүзеге асырудың Жол картасын жасақтауға келісті.
Оның сыртында, Мемлекеттік басқару академиясы мен Қазан федералдық университеті, Қазақстанның Сыртқы сауда палатасы мен Татарстан сауда-өнеркәсіп палатасы, «Astana Hub» ІТ стартап халықаралық технопаркі мен «ІТ-парк» жоғары технологиялар саласындағы технопаркі, «Семей автоқұрастыру зауыты» ЖШС мен «РариТЭК жөндеу-механикалық зауыты» ААҚ арасында ынтымақтастық туралы құжаттарға қол қойылған болатын.
Татарстан Президенті Астанаға жұмыс сапары барысында «Астана» халықаралық қаржы орталығы мен Ислам қаржы ұйымы саммитіне қатысты.