«Бұл іс-шарада бірнеше семинар мен конференциялар өтеді. Талқыланатын басты тақырыптарының бірі телерадиохабар тарату саласын заманға сай дамыту болмақ. Форумға Азия-Тынық мұхиты елдерінің ұлттық және аймақтық хабар тарату бірлестіктерінің 100-ден аса өкілі қатысады. Телевизия мен радионы жоғары технология бойынша әрдайым дамытып отыру қажет екенін бәріміз жақсы түсінеміз. Қазақстан бұқаралық ақпарат құралдары да бұл үрдістен қалыс қалмауы керек», деді Ақпарат және коммуникациялар министрі Дәурен Абаев.
Семинарларда медиа саласындағы жетекшілер үшін радиожиіліктің қалыптасуы, аудиторияға және оның зерттеу құралдарына баға беру, Азия және Еуропа медиа нарығындағы озық тәжірибелер талқыланады. Одан бөлек Қазақстанда тұңғыш рет кең ауқымды салалық конференциялар өткізіліп, ол жерде Азия радиосына қатысты сұрақтар қойылады. Азиядағы және Еуропадағы медиа үшін ортақ мәселелерді талқылау мақсатында «Media-2020» конференциясы қорытынды шарасы өтеді. Модераторлар ретінде Аустралия, Бельгия, Германия, Жапония, Қытай елдерінің жеке және ұлттық телерадио компаниялардың басшылары шақырылады.
«Аталған ауқымды шараға әлемнің 37 елінен келген 100-ге жуық өкіл қатысады. Жиын аясында бірнеше маңызды шаралар өткізу жоспарланған. Солардың ішінде «ABU Radio Song Festival» ән фестивалі де бар. Конкурсқа Түркия, Непал, Мальдив және Қазақстанның өнерпаздары қатысады, бұл шара «Қазмедиа орталығының» кино-концерт залында өтеді», деді «Қазмедиа орталығының» бас директоры Ләззат Жүнісова.
Рауан ҚАЙДАР,
«Егемен Қазақстан»
