«Біз цифрлы технологияны қолдану арқылы құрылатын жаңа индустрияларды өркендетуге тиіспіз. Бұл – маңызды кешенді міндет. Елде 3D-принтинг, онлайн-сауда, мобильді банкинг, цифрлы қызмет көрсету секілді денсаулық сақтау, білім беру ісінде қолданылатын және басқа да перспективалы салаларды дамыту керек. Бұл индустриялар қазірдің өзінде дамыған елдердің экономикаларының құрылымын өзгертіп, дәстүрлі салаларға жаңа сапа дарытты», деді Елбасы. «Цифрлы Қазақстан» бағдарламасының 4 негізгі бағыты бар.
Бірінші – ауыл-аймақты кең жолақты интернетпен қамтамасыз етіп, еліміздің транзиттік мүмкіндіктерін арттыру.
Екінші бағыт – экономиканың салаларына (көлік және логистика, денсаулық сақтау, білім беру, ауыл шаруашылығы және электронды сауда) цифрлы технологияны енгізу.
Үшіншісі – мемлекеттік органдар жұмысының сапасын арттыру.
Төртінші – IT мамандарды даярлау.
Елбасымыздың Жолдауындағы бірінші бағытты алсақ, ауыл-аймақты кең жолақты интернетпен қамтамасыз етіп, еліміздің транзиттік мүмкіндіктерін арттыру бұл барлық өңірлермен бірге біздің ауданымызға да үлкен мүмкіндік береді. Қарапайым ғана мысал, сымсыз телефондар, желілік телеарна мемлекет тарапынан жасалған осындай іс-әрекеттердің жемісі.
Бұл өзгерістер біздің күнделікті өмірімізден көрініс тауып отыр. Мәселен, 90 жылдық тарихы бар Арал индустриялық-техникалық колледжінде де «Байланыс құрастырушысы кабельші» мамандығында білім алушыларға бұрын байланыс желісінде мыс кабелімен үйренсе, қазіргі таңда талшықты-оптикалық кабельмен үйренуде.
«Цифрлы Қазақстан» бағдарламасының түпкі мақсатына терең үңіле қарасақ, бұл жерде халықтың өмір сүру деңгейін жоғары сатыға көтеру, көптеген әлеуметтік мәселелердің оң шешімін табуға зор заманауи мүмкіншіліктер жасау қарастырылған. Қала берді, Елбасы мақсат етіп қойған дамыған отыздықтың ортасынан ойып тұрып орын алу жалпыхалықтық міндет. Сондықтан бағдарламаның аясында уақыттың үдесінен шығу үшін жаңа талаптарға сай еңбек ету қажет.
Назарбек НҰРМАНОВ,
Арал индустриялық-техникалық колледжінің
өндірістік оқыту шебері
Қызылорда облысы