«Ұлттық бірыңғай тестілеудің орташа балы бойынша облысымыз үздік 5 өңірдің қатарында. Ал 5 жыл бұрын 16-орында болатын. Ресейдің жетекші техникалық университеттерімен тығыз байланыс орнатудың арқасында бүгінде 452 мектеп бітірушіміз Мәскеу және Санкт-Петербург қалаларының үздік жоғары оқу орындарында білім алып жатыр. Биыл студенттердің алғашқы легі диплом алады, олардың жұмысқа орналасу мәселесін біз алдын-ала дайындадық», деді Қырымбек Елеуұлы.
Парламентаралық Ассамблея жанындағы университет құрамында 3 институт, 4 факультет пен 17 кафедра бар. Университет ректоры Ерлан Ысқақов оқу орнының негізгі мамандықтары қатарында бизнес-информатика, заңгерлік қызмет көрсету, туризм, экономика, менеджмент, кеден ісі, жарнама және жұртшылықпен байланыс, конфликтология, дизайн, қолданбалы көркемөнер және ұлттық кәсіпшілік, сауда ісі, психология бар екендігін айтты.
«Қызылорда облысы алғашқылардың бірі болып кадрларды дайындау саласында әріптестік орнату бойынша ұсынысымызға келіскеніне өте қуаныштымыз. Қазіргі таңда мамандарды даярлау мәселесінде жеке көзқарас тиімді. Биыл университетімізге қосылған жаңа бағыт – бизнес-информатика. Бұл мамандық аясында студенттер цифрлы экономика дамыған заманда блокчейн мен криптовалюта саласын зерттейтін болады», деді ол.
Сонымен қатар университет өкілдері қызылордалық мұғалімдер мен ғылыми қызметкерлерді Нобель сыйлығының лауреаты Жорес Иванович Алферов басқаратын Еуразиялық ғылыми форумға қатысуға шақырды. Форум жыл сайын күзде ТМД елдерінің қатысуымен өтеді.
Меморандум аясында тараптар бірлескен іс-шаралар мен жобаларды қолға алмақ. Университет оқуға түсу сынақтарынан сәтті өткен қызылордалық түлектерге жыл сайын 10 грант бөлетін болады.
Қызылорда түлектеріне 2014 жылдан бастап Мәскеу болат және қорытпалар институты, Санкт-Петербург өсімдік полимерлері мемлекеттік технологиялық университеті, К.А.Тимирязев атындағы Ресей мемлекеттік аграрлық университеті мен И.М.Губкин атындағы Ресей мемлекеттік мұнай және газ университеті өңірге қажетті мамандықтар бойынша оқыту үшін гранттарды бөліп келеді. Сонымен қатар биылдан бастап қызылордалық жастар үшін «Киберқауіпсіздік» және «Математикалық процестерді модельдеу» мамандықтары бойынша М.В.Ломоносов атындағы Мәскеу мемлекеттік университетінің магистратурасына 20 грант бөлінетін болды.
Жыл сайын облыс әкімінің гранттары есебінен ауылды жердегі аз қамтылған отбасылардан шыққан 100-ге жуық жас білім алып жатыр. Қазіргі таңда грант иелерінің саны 700-ге жетті. Биыл грант санын 200-ге жеткізіп, оның 70 процентін ақпараттық технологиялар саласындағы мамандықтарға бағыттау жоспарланған.
Қызылорда облысының әкімдігі өңірге қат мамандықтар бойынша мәселені осылайша шешіп жатыр.
Бақтияр ТАЙЖАН,
«Егемен Қазақстан»
Қызылорда облысы