Еркін дамудың кезеңі

Қазақ жерінің тұң­ғиығы табиғи байлыққа то­лып тұр. Мұнай мен газ­дың да, алтын мен көмірдің де мол қоры бар, бір сөзбен айтқанда, біздің жерімізде Менделеев кестесіндегі эле­мент­­­тердің барлығы дерлік кездеседі. Алайда, еліміз өз тәуел­сіздігін алмай тұрғанда осынау табиғи байлықты халық қаже­ті­не жарата алмадық. Сол себептен отандық экономикамыз­ды қарышты өркендету мүмкін болмады. Бұл жасырын емес. Тіпті Қазақстан тәуелсіздігінің елең-алаңындағы қиыншы­лық­тар да ұмытыла қойған жоқ. Тәубе деп айтайық, тәуелсіздік біздің еліміздің бағын ашты, экономиканың әр саласын еркін дамытуға даңғыл жол ашып берді. Мұны еліміздің әр өңі­рінің экономикалық-әлеуметтік дамуынан байқай аламыз. Ел Тәуелсіздігінің жиырма жылдық мерейтойлық салтана­тын­да сөз сөйлеген Тұңғыш Пре­зидентіміз Нұрсұлтан Назарбаев бұдан былай Қа­зақ­станды индустрияландырудың маңызы айрықша екеніне ор­ын­ды тоқталды. Өйткені, кез келген мемлекеттің индустриясыз өркен жайғаны кемде-кем. Әсі­ресе, бүгінгі жаһандану дәуі­рін­де индустриясы кең ауқымда дамымаған мемлекеттер бәсе­ке­ге қабілетті бола алмауы ғажап емес. Табиғи байлықты шикізат ретінде әлем рыногына молы­нан шығаруға болар, бірақ түп­тің-түбінде ен байлық таусыл­май­тын дүние емес қой. Міне, мәселеге осы тұрғыдан үңіл­ген­де Елбасының «Біздің жаңа индустрияландыру –Тәуелсіз­дік­тің мәңгілік қозғалтқышы. Бүгінде Қазақстанда электро­ни­каның, машина жасаудың, авиация құрылысының, локомотивтер мен вагондар өндірісінің, құрылыс индустриясының жаңа салалары мен елімізде бұрын ешқашан болмаған басқа да салалар құрылуда. Жаңа индус­трияландыру – жаңа ғасырдың кең ау­қым­ды өр­ке­ниетті жобасы» деп екпін түсі­руі­нің еліміз­дің келешегі үшін маңызы айрықша екенінде дау жоқ. Қазір еліміздің экономикасы шын мәнінде еркін да­мудың жолына түсті. Соның дәлелі ретінде Елбасы баяндамасында айтыл­ған­дай, индустрияландырудың инновациялық жобалармен ай­шықтала түскенін айта аламыз. Бұл жобаларды іске асырудан шағын және орта бизнес өкіл­дері тыс қалмайды. Өйткені, тәу­елсіздікпен бірге бұрын өңі­міз түгілі түсімізге кірмеген кәсіпкерлік саласы қарқынмен дами бастады. Бұл күндері кә­сіпкерліктің өркен жаюын эко­номиканың әр саласынан бай­қаймыз. Кәсіпкерлікті дамыту үшін мемлекет тарапынан үл­кен қолдау жасалды. Осы сала өкілі саналатын өзім де кәсіп­керлігімді тұз өндірісі сала­сында жалғастырудамын. Мұ­най­лы Атыраудың Индер ауда­нындағы тұз көлінен күнделікті өмірімізде жиі тұтынатын ас тұзынан бастап, техникалық тұз­ды да өндіреміз. Енді жаңа бір өнім түрін шығаруды бас­тағалы отырмыз. Мұның бәріне Тәңір сый­ын­дай болған Тәуелсіздігіміздің арқасында қол жеткізіп отыр­мыз. Әр қазақ үшін, әр қазақ­стан­дық үшін бойтұмары­мыз­дай болған Тәуелсіздігіміздің қа­дірін арттырған Елбасы Нұр­сұлтан Назарбаевтың ерен еңбегінің жемісі екені де жа­сырын емес. Елбасы елімізді ер­кін дамудың жолына түсірме­генде бүгінгідей бәсекеге қабі­лет­ті әрі сапалы өнімдер өн­діруге қадам жасамаған болар едік. Енді міне, бүгінгі биігімізді индустрияландыру арқылы нықтай беретінімізге сенемін. Өйткені, еліміз үшін еркін дамудың кемел кезеңі басталды. Абиырбек ТОҚТЫБАЕВ, «Тұз» ЖШС директоры. Атырау облысы.