Игілігіміздің бастау қайнары

Елбасы Нұрсұлтан Назар­баев­тың кез келген келелі жи­ынды «Қымбатты отандастар! Ардақты ағайын!» деген жүрек жылытар сөздермен бас­тай­тынының мазмұн-тәлімі мол. Ал, Тәуелсіз­ді­гі­міздің 20 жылдығын атап өту салтанатында бұл сөз­дердің құдірет мәні терең айшықталып, баршамыздың көңілімізді өсіріп, қуаныш шашып тұрды. Біз Тұңғыш Президентіміздің – Ұлт көшбасшысының бойындағы асыл қасиеттердің өзінен Тәуелсіздік ұғымының қаншалықты қымбат екендігін терең түйсіндік. Көне тарих адамзат арманының орындалар тұсын да меңзей біледі. Халық үшін азаттық, тәуелсіздіктен артық бақыт жоқ. Бабалар көксеген көк байрақты аспандату біздің заманымыздың еншісіне тиді. Ол да аспаннан түсе қалған жоқ. Президент айтқандай, еліміз тарих алдындағы жауапкершілікті адал атқарып келеді. Бұл жоғары баға. Әйткенмен, ертеңді еңселендіру үшін ерен шаруа тындыру керек. «Біздің алдымызда тәуелсіздікті қорғау, татулықты сақтау, тұрақтылықты орнықтыру сияқты аса күрделі тарихи істер тұр» деді Нұрсұлтан Әбішұлы. Сөзінде сенім бар. Шындығында, алмағайып кезеңде әлемді аузына қаратқан мемлекет құра білген қазақстандықтар Тәуелсіздікті тәу етіп, қолға қонған бақытты қадірлей білетіні шәксіз. Біз жұлдызды жиырма жылдың қуанышына бөленген халықпыз. Бақыт пен қуаныш бағалағанның басында тұрады. Елбасының дәуір төріндегі осынау данышпандық сөздері нақты істермен жалғасып, жанымызды жадырата беретініне сеніп қана қоймай, білек сыбана үлес қосуымыз қажет, ағайын. Әрдайым ордалы Отанымызбен мақтанып жүрейік! Қуаныш НҰРСАДЫҚОВ, кәсіпкер, аудандық мәслихаттың депутаты.  Ақмола облысы, Ақкөл ауданы.