Бүгінде Қызылорда қаласында электр және ауызсумен жабдықтаушы коммуналдық кәсіпорындарында «Смарт сити» үлгісінде жұмыс істеу, энергоүнемдегіш қондырғылар, қашықтықтан басқарылатын есептеуіш құралдарын орнату, бір орталықтан басқару жүйесін енгізу жұмыстары қолға алынды.
Елбасының халықаралық қаржы ұйымдарының әлеуетін пайдалану жөніндегі тапсырмасына сәйкес, Еуропалық қайта құру және даму банкімен бірлесіп Қызылорда қаласының сумен қамту және суды бұру жүйесін қайта жаңғырту жобасы іске асырылуда. Жоба барысында облыс орталығының ауызсумен жабдықтау және суды бұру жүйесін басқару, жерасты ақауларын анықтайтын заманауи техникалар сатып алынды.
Тұтынушылар тарапынан коммуналдық төлемдерді оңтайландыру мақсатында өткен жылдан бастап бірыңғай төлем құжаты енгізілді. Бүгінде Қызылорда қаласы тұтынушыларының 80 проценттен астамы осы қызмет түрін пайдалануда.
2017 жылдың 1 шілдесінен бастап қанатқақты жоба ретінде «Ақмешіт», «Мерей» шағын аудандарында бірыңғай төлем құжатын енгізу жобасы басталды. Бүгінде аталған жобаға қатысты барлық коммуналдық қызмет көрсететін мекемелер арасында бірқатар жұмыс жүргізілді.
Қазіргі таңда автоматты түрде телефон және хабарлама арқылы ескерту функциясы әзірленуде. Өткен жылдың қыркүйек айында өткен мемлекеттік конкурстың нәтижесінде «Қызылорда тазалығы» ЖШС, «Тұрғын үй қызметі» МКК және «Энергосервис» ЖШС мен биллинг бағдарламасын әзірлеу, бірыңғай төлем жүйесіне енгізу, төлемдерді қабылдау бойынша келісімшарттар жасалып, бүгінгі таңда «Қызылорда тазалығы» ЖШС-нің 15 мың, «Тұрғын үй қызметі» МКК-нің 16 мың тұтынушысы биллинг бағдарламасына енгізілді.
Қаңтар айында электр, жылу энергиясы, «Қызылорда тазалығы» ЖШС және «Тұрғын үй қызметі» МКК, ішінара су мен су бұру коммуналдық қызметтері қалыптастырылған 79 мың бірыңғай төлем құжаты таратылды.
«Қауіпсіз үй» жобасы бойынша «Қазақтелеком» АҚ филиалымен көпқабатты үйлердің кіреберісіне бейнебақылау жүйесін орнату жобасы жүзеге асырылуда. Жоба аясында ағымдағы жылы көпқабатты үйлердің 588 кіреберісіне және бірінші қабаттарына бейнебақылау камералары орнатылды. Жоба Қызылорда қаласындағы көпқабатты тұрғын үйлердің және тұрғындардың қауіпсіздігін қамтамасыз етуге мүмкіндік береді.
«Ақылды» электр желілері бойынша 2018-2019 жылдары Қызылорда қаласында және қала аумағында орналасқан 300-ден аса көпқабатты үйдің 10/0,4 кВ қосалқы стансаларының сөрелерінде орналасқан 600 электр энергиясы есептегіш құралын электр энергиясын бақылаудың автоматтық жүйесіне енгізу жоспарлануда.
Аталған жұмыстарды жүргізу көпқабатты және жеке тұрғын үй секторларындағы электр энергиясының ұрлығын төмендетуге және желі параметрлерін бақылау арқылы 10/0,4 кВ қосалқы стансаларындағы ақауды жедел анықтауға және қалпына келтіруге мүмкіндік береді.
Қала инфрақұрылымының дамуы және жаңа су құбырлары желілері құрылыстарының жүргізілуіне байланысты тұрғындардың саны артып, тиісінше су тұтыну көлемінің артуы салдарынан ысырапқа жол берілуде. Осы орайда сумен қамтуды және су бұруды бақылау жүйесі жобасы аясында сумен қамту жүйелерін жаңғырту және жақсарту мақсатында Қызылорда қаласының бюджеттік мекемелерінде модеммен жасақталған су есептегіш құралдарын орнату жоспарлануда.
Жоғарыда аталған жұмыстарды жүргізу нәтижесінде сумен қамту жүйесінің пайдалану сенімділігі артады, сумен қамту жұмысы үздіксіз болады. Есептегіш құралдарды орнату есебінен сумен қамту жүйесінің және технологиялық үрдістерінің маңыздылығы артады. Бұл бағыттағы жұмыстар бұдан әрі жалғасын табуда.
Медет УСАИН,
Қызылорда облыстық энергетика және тұрғын үй-коммуналдық шаруашылық басқармасының басшысы
Қызылорда облысы