Кеше Алматыдағы Ұлттық баспасөз клубында Жалпыұлттық социал-демократиялық партиясының бастамасымен баспасөз мәслихаты болып өтті. Бұқаралық ақпарат құралдарының өкілдерімен өткен кездесуде Жаңаөзен мен Шетпедегі оқиғаларды тергеу бойынша тәуелсіз қоғамдық комиссия құрылғаны мәлім болды.
Жалпыұлттық социал-демократиялық партиясының бас хатшысы Әміржан Қосановқа баспасөз мәслихатында көтерілген мәселелерге орай сауалмен қайырылған болатынбыз. Бізге берген қысқа сұхбатында Жалпыұлттық социал-демократиялық партиясының бас хатшысы былай деді:
– Жаңаөзендегі оқиғалар бүкіл қоғамды дүрліктіргені рас. Президент бұл мәселеге қатысты өз пікірін айтты. Үкіметтік комиссия құрылды. Бірақ, бізді алаңдатып отырған жәйт – біріншіден, ақпараттың жетімсіздігі, екіншіден, біржақтылығы. Яғни, тек ресми өкілдердің аузынан шығып жатқан ақпарат. Ал интернет желісінде, ел ішінде әртүрлі әңгімелер айтылып жатыр. Сондықтан елді тыныштандыратын, халық арасына іріткі салмау үшін, арандату болмау үшін жан-жақты, объективті көзқарастар керек. Ол көзқарасты қалыптастыру үшін біз қоғам өкілдерінен – шығармашылық интеллигенция, қоғамдық ұйымдар мен құқық қорғау органдары және саяси партиялардың өкілдері бірігіп, 18 адамнан тұратын тәуелсіз қоғамдық комиссия құру туралы шешім қабылдадық.
Бұл комиссия құрамына кірген азаматтардың бәрі елге белгілі. Осы комиссияның дуалы аузынан шыққан сөзге халық сенеді деген ойдамын.
Екінші мәселе, біз отау ішінен отау тіккіміз келмейді. Үкіметтік комиссиямен де, жергілікті органдармен де жұмыс істеуге дайынбыз. Олармен қоян-қолтық әрекет етеміз деп ойлаймыз. Өйткені, илегеніміз бір терінің пұшпағы. Біздің мақсат –Жаңаөзен оқиғасына қатысты ақиқат мейлінше айтылсын деген ой.
Талап етіп әрі ұсыныс жасап отырған үшінші мәселе – осы оқиғаларды зерттеу жөніндегі Елбасы деңгейіндегі Мемлекеттік комиссия қажет. Сол комиссия құрылып, осы оқиғаның себептері мен салдарын, оның нақты неліктен болғанын айтып, осы және басқа да сауалдарға жауап беруі тиіс, – дейді Әміржан Қосанов.
Комиссияның құрамына кіргендердің арасында жазушылар Ғаббас Қабышев пен Софы Сматаев, ЖСДП-ның өкілдері Әміржан Қосанов, Болат Әбілов, тіркелмеген «Алға» партиясының жетекшісі Владимир Козлов, «Guljan.org» сайтының бас редакторы Гүлжан Ерғалиева, экономист Мұхтар Тайжан бар.
Баспасөз мәслихатын өткізген ұйымдастырушылар комиссия мүшелерінің сейсенбі күні таңертең Ақтауға ұшып шығатындарын жеткізді.
Айнаш ЕСАЛИ.
Алматы.