«Рухани жаңғыру» бағдарламасы аясында атқарылған бұл жобаның алғашқы кезеңі өткен жылы табысты жүзеге асты. «Қазақстанның 100 жаңа есімі» қанатқақты жобасы бірден қоғамдық талқылауға түсіп, халық тарапынан қызу қолдау тапқан болатын. Ұйымдастырушыларға осы жобаны жалғастыруды өтінген, жаңа табыстар тарихын сараптау туралы ұсыныстар көптеп түскендіктен Ақпарат және коммуникациялар министрлігі Қазақстан халқы Ассамблеясы хатшылығымен ақылдаса келе, жобаның екінші кезеңіне іріктеу жариялауды жөн деп шешті.
Биылғы іріктеудің талаптары бойынша үміткер елдің жағымды имиджін қалыптастыруға ықпал ететін салаларда жарқын жетістіктері бар, кейін оны қоғамда ілгерілету беделіне ие 18 жасқа толған Қазақстан азаматы болуы шарт. Сондай-ақ қатысушының қоғамдық-саяси және еңбек жолы өзгелерге үлгі болуы тиіс. Жастарды адамгершілік, патриоттық тұрғыда тәрбиелейтін, туған жерін сүюге үндеп, қоғамда еңбек культін қалыптастыра алатын адамдар мен заманауи Қазақстанның дамуына нақты үлес қосып, еліміздің жетістіктері мен табыстарын бейнелей алатын азаматтар қатыса алады. Жобаға қоғамдағы барлық саланың өкілдері: дәрігерлер, кәсіпкерлер, ғалымдар, мұғалімдер, спортшылар, өнер қайраткерлері және өзге де салада өнегелі еңбек етіп жүрген адамдардың қатысуына мүмкіндігі бар. «Қазақстанның 100 жаңа есімі» жобасының екінші кезеңіне қатысуға салалық ассоциациялар, қоғамдық ұйымдар мен бірлестіктер тарапынан да белсенділік күтілуде.
Елбасы бұл жоба турасында: «Жобада нақты адамдардың нақты тағдырлары мен өмірбаяндары арқылы бүгінгі, заманауи Қазақстанның келбеті көрініс табады. Тәуелсіздік дәуірінде өзінің еңбегімен, білімімен, өнерімен озып шыққан қаншама замандастарымыз бар. Олардың жүріп өткен жолдары – кез келген статистикадан артық көрсеткіш. Жастар өмірге шынайы көзбен қарап, өз тағдырларына өздері иелік ете алатын азаматтар болуы үшін оларға үлгі ұсынуымыз керек», деген болатын. Сондай-ақ «Қазақстанның 100 жаңа есімі» жобасын іске асырудың маңызына назар аударып, оған қатысушыларға қоғам тарапынан артылған жауапкершіліктің мол екенін ескерткен-ді.
Жобаның алғашқы кезеңінде 340 мыңнан астам қазақстандық өздері таңдаған тұлғаларға 1 миллион 376 мың дауыс берді. Ал жалпы тізімге қатысуға 2100 адам өтініш ұсынған. Бүгінде «100 есім» атанған азаматтар түрлі әлеуметтік маңызды шараларға қатысып, жеке жобаларын жүзеге асыруда. Сондай-ақ жастарды жігерлендіруге арналған сұхбат алаңдарына спикер ретінде қатысып, жеке табыс құпиясымен және тәжірибесімен бөлісіп жүр.
Венера ТҮГЕЛБАЙ,
«Егемен Қазақстан»
