Өткен жылы әлемнің алты елінде таратылған, 200 миллионнан аса адам тамашалаған үлкен жоба жалғасын табады.
Сонымен, Алматы қаласында «31 арнаның» ұйымдастыруымен халықаралық «I`m a Singer Kazakhstan» талант-шоуының екінші маусымының тұсауы кесілді. Биылғы маусымның сыйлық қоры 50 000 000 теңгеге жетті. Қазақстанда баламасы жоқ ғаламат жобаға әлемнің әр түкпірінен ең мықты дауыс иелері жиналады.
Халықаралық талант-шоуының жаңа басталуына орай жоба жетекшілері басты жаңалықтарымен бөлісіп, ресми түрде жоба кастингінің аяқталғанын хабарлады.
Осы өнердің өзі де өміріміздің бүкіл салаларымен сабақтас болғандықтан, «31 арнаның» бас директоры Бағдат Қожахметов аталмыш жоба Қазақстанның көрікті мекендерін қамтуға, туризмді де насихаттауға күш салатындығын айтты. Өйткені биылғы байқауға шет мемлекеттерден де қатысуға тілек білдіріп отырған таланттар көбейді. Мәселен, биылғы жанды дауыстар жарысына қатысуға 4 мыңнан аса адам өтініш жіберді. Олардың арасында Қазақстаннан бөлек, Ресей, Украина, Өзбекстан, Қырғызстан, Әзербайжан, Иран, Армения және Беларусь мемлекеттерінен ниет білдіргендер де бар.
Әнсүйер қауымның есінде болса, танымал әншілеріміз бұл жоба былтыр басталғанда бақ сынауға аса ықыласты болмап еді. 2017 жылы күз-қыс телемаусымының ең ауқымды музыкалық оқиғасы атанған «I’m a Singer Kazakhstan» жобасының бірінші маусымына 6 елден 8 кәсіби ән орындаушы қатысып, қазақстандық әнші Қайрат Түнтеков жеңіске жеткен-ді.
Есесіне биылғы жобаға еліміздің 30 шақты танымал эстрада жұлдызы қатысқалы отыр. Және қатысатын мемлекеттердің де саны артты.
Сондай-ақ биыл ғаламат шараның ережелеріне өзгерістер енді. Бұдан былай шоуға 16 жасқа толған, өзіне сенімді кез келген үміткер өтініш білдіре алады.
«Бұл жоба – кез келген музыкалық эстраданың дәргейін көтеретін шоу, – дейді «31 арнаның» бас директоры Бағдат Қожахметов. – Ол жай ғана ән сайысы емес, оны жұлдыздардың өнері деп қарау қате. Ол, ең алдымен, өзіндік драматургиясы бар, әншінің ішкі жан тебіренісін бейнелейтін бірегей оқиға. Мұндай жобалардың басым бөлігі көптің арасынан біреуді суырып алып шығып, жұлдыз жасауды мақсат тұтса, бұл шоудың мақсаты – керісінше жұлдыздың да адам екенін көрсету. Бір ұқсастығы, екеуінің де құралы – ән».
Биылғы маусымда сарапшылар да жұрттың сүйікті әншілерінен құралған. Олардың арасында Сәкен Майғазиев, Мақпал Жүнісова сынды әншілер бар.
– Мұндай ауқымды халықаралық жобаға қазылық ету – үлкен мәртебе. Бас жүлдегер Алматыда жеке концертін өткізіп, жаңа әнін жазып, бейнебаян түсіруге және оны қазақстандық радиостанцияларда, музыка телеарналарында жыл бойы ротациялауға мүмкіндік алады, – дейді шоу жаңалықтарымен бөліскен байқау төрешісі Сәкен Майғазиев.
Айнаш ЕСАЛИ,
«Егемен Қазақстан»