Көшпелі жұрт өкілдерінің басын қосқан айтулы шараға Қазақстан, Түркия, Әзербайжан, Қырғызстан, Башқұртстан, Дағыстан сияқты әлемнің 30-дан астам елінен делегация қатысты. Осы жиын аясында республикалық «Егемен Қазақстан» газеті мен «ҚазАқпарат» халықаралық ақпарат агенттігінің, сондай-ақ Халықаралық Түркі академиясының қолдауымен Қазақстанның Венгриядағы елшілігі ұйымдастырған «Ұлы Дала рухы» фотокөрмесі ашылды.
Туысқан елдердегі өзара мәдени және достық байланыстардың жарқын үлгісіне айналған дәстүрлі құрылтай биыл оныншы рет ұйымдастырылып отыр. Құрылтайдың ашылу салтанатында ежелгі «Тұран» әскери шеруі өтіп, көшпелілердің жауынгерлік дәстүрі жаңғыртылды.
Жоғарыда айтып өткеніміздей, құрылтайда республикалық «Егемен Қазақстан» газеті мен «ҚазАқпарат» халықаралық ақпарат агенттігінің, сондай-ақ Халықаралық Түркі академиясының қолдауымен Қазақстанның Венгриядағы елшілігі «Ұлы Дала рухы» фотокөрмесін ұйымдастырды.
Астананың 20 жылдығына арналған көрмеде «Егемен Қазақстан» газеті мен «ҚазАқпарат» ХАА-ның Ерлан Омаров, Мұхтар Холдорбеков, Виктор Федюнин, Александр Павский және Ильзат Сафаргалиев сынды фототілшілерінің таңдаулы жұмыстары көптің назарына ұсынылды. Қазақстанның бай тарихы мен бүгінгі қайталанбас келбетінен сыр шертетін фотосуреттерге құрылтай қатысушылары мен қонақтар ерекше қызығушылық білдірді. Көрмеге арнайы қатысқан Мажарстан парламентінің вице-спикері Шандор Лежак жоғары деңгейде өткен шара үшін ұйымдастырушылар алқасына ризашылығын білдірді. Бұдан бөлек, Бугац шағын ауданындағы екі күнге созылған құрылтай алаңы театрландырылған сан алуан шоу-бағдарламалар мен түрлі этнотоптардың ән салуымен, археологиялық-антропологиялық көрмелер мен көздің жауын алар қолөнер жәрмеңкесімен толыға түсті.
Ая ӨМІРТАЙ,
«Егемен Қазақстан»