Елімізге танымал Шәкизада Байбатжанова, Құрман Шойынбаев, Сәуле Желдібаева, Марат Әйтімов, Нұрғали Тұрлыбеков, Хадиша Сейітова, Жұбаныш Жексенұлы, Гүлжазира Қайырбекова, Тоқтар Серіков, Асқар Жүнісбеков, «Жігіттер» квартеті, «Сарын» тобы сынды көптеген өнер иелері 1992 жылдан бері дәстүрге айналған осы байқаудан қанат қаққанын айта кетелік. Әр жылғы байқаудың өзіндік ерекшелігі, жаңалығы бар. Мысалы, биылғы жетістігі ұлы композитордың орындалмай жүрген 15-тен аса әні жарыққа шығарылып, арнайы аспаптардың сүйемелдеуімен тыңдарманға жол тартты. Олардың қатарында «Кел, Бурабайға», «Байқоңыр», «Келін келді», «Көккөлдегі кештер-ай», «Егіз мақта», «Ғашық күндер» және Абай Құнанбаевтың сөзіне жазылған «Тыңда мені, достарым» сынды әндер бар.
Биыл 26-шы рет өткізілген байқау өнерсүйер қауымға жаңа есімдерді әйгіледі. Алдымен Түркістан облысының мәдениет және тілдерді дамыту басқармасы, облыстық мәдениет және халық шығармашылығы орталығының ұйымдастыруымен өткен ән байқауы «Шәмші әлемі» гүлзарындағы композитор ескерткішіне гүл шоқтарын қою рәсімінен бастау алып, Ш.Қалдаяқов атындағы облыстық филармонияда жалғасын тапты. Мақсаты – Шәмші Қалдаяқовтың шығармаларын дәріптеу, халық арасында ән өнерін дамыту, қазақ әндерін орындаушылар арасынан жас талант иелерін анықтап, кәсіби бағдар беру, жеке шығармашыл тұлғалардың қалыптасуына ықпал ету, әншілердің орындау шеберліктерін арттыра отырып, оларға қолдау көрсету және отансүйгіштікке баулу, ұлттық рухта тәрбиелеу болатын дәстүрлі өнер додасының аудан, қалада өткен бірінші кезеңіне 200-ге жуық үміткер өтініш білдірген. Оның ішінен 21 үміткер финалға кезеңге жолдама алды. Өнер бәйгесіне 15 - 29 жас аралығындағы үміткерлер қатысты. Ал үміткерлердің талантын шәмшітанушы, белгілі композитор Қалдыбек Құрманәлі төрағалық еткен қазылар алқасы таразылады.
Көпшілікке керемет әсер сыйлаған, Шəмші Қалдаяқовтың туған күніне орай ұйымдастырылған «Менің Қазақстаным» ән байқауының жеңімпаздары анықталып, алдымен облыс әкімінің арнайы жүлдесі берілді. Айтулы марапат Шардараның жас таланты Гүлмарал Жақыпбайға тапсырылды. Жүлделі 3-орынға Арыс қаласының тумасы Ердос Сейілхан лайық деп танылды. Екінші орынға Жетісайдың үкілеген үмітін арқалай келген ару Малика Қалдыбай ие болды. Бірінші орынды Келес ауданының әншісі Бексұлтан Отарбеков еншіледі. Ал басты сый – бас жүлдені Түлкібас ауданының таланты – Бағдат Нысанбай жеңіп алды. Жеңімпазға 500 мың теңге қаржылай сый-таралғы тапсырылды. Марапаттау рәсімі, осы өнер додасынан түлеген және өзге де жергілікті өнер жұлдыздарының қатысуымен қорытынды-концертке ұласты.
Ғалымжан ЕЛШІБАЙ,
«Егемен Қазақстан»
Түркістан облысы
