Осындай жарнамаларды таратып отырған құрылыс компаниялары мен тұрғын үй кооперативтері ғаламтор мен әлеуметтік желілерде «0-20-25», «5-19-25», «5-10-25» сынды түрлі акциялар ұйымдастырып жатыр. Алайда олардың баспаналы болуды армандаған халыққа ұсынып отырған талаптары мүлде басқаша. Мысалы, атауы айқайлап тұрғанымен, несиені 25 жылға емес, 25 айға ғана беруі мүмкін. Немесе «20» саны алғашқы жарна емес, несие бойынша үстеме мөлшерлеме болуы әбден ықтимал.
Мұндай санда бар да, санатта жоқ акциялардың аты жер жарып тұрғанымен, ертең талайды сазға отырғызып кетуі бек мүмкін. Оған негіз де жоқ емес. Өйткені бұған дейін де тұрғындар мен құрылыс компаниялары және тұрғын үй кооперативтері арасында түсінбестік орын алып, соңында аталған мекемелер жауапкершіліктен жалтарып, қарапайым халық жиған-тергенінен қағылған оқиғалар кездескен-ді. Осындай жайттарды ескерген «Баспана» ипотекалық ұйымы кейін келеңсіздіктер туындамауы үшін халықты мұндай акциялар мен жарнамаға сақтықпен қарауға шақырды.
Бірден айту керек, аталған акцияларда көрсетілген шарттар «7 – 20 – 25» бағдарламасының шарттарынан мүлде бөлек. Бұл бағдарламада үй бағасы мен несие мерзіміне сәйкес, ай сайынғы төлемдердің кестесі әзірленген. «Баспана» компаниясының өкілдері кез келген жағдайда артық төлемдерге ұрынбау үшін кестені пайдалануға кеңес береді. Бұған қоса, ипотекалық несиені тек қана бағдарламаның екінші деңгейлі серіктес-банктері бере алады. Қазіргі таңда тізімде «Центркредит», АТФБанк, Цеснабанк, Bank RBK және Еуразиялық банк бар. Ал құрылыс компаниясы немесе тұрғын үй кооперативтері еш уақытта «7 – 20 – 25» бағдарламасымен несие бере алмайды.
− Бүгінгі таңда «7 – 20 – 25» бағдарламасының шарттары нарықтағы ең тиімді ұсыныс болып отыр. Тиісінше, осы нарықтағы түрлі компаниялардың «7 – 20 – 25» бағдарламасының атын жамылып, өз өнімдерін өткізуге ұмтылатындары да байқалады. Біз нарықтың дамуын қолдаймыз, алайда халықты алдауға түбегейлі қарсымыз, – дейді «Баспана» ипотекалық ұйымының басшысы Қайрат Алтынбеков.
Жалпы, бүгінгі таңда халықтың баспана алуға деген құлшынысы өте жоғары. Статистика комитетінің дерегіне сүйенсек, шілде айында тұрғын үйлердің бағасы 0,1 процентке төмендесе, жалға беру құны 0,5 процентке қымбаттағаны анықталып отыр.
Еркежан АЙТҚАЗЫ,
«Егемен Қазақстан»
