Астанада Мемлекеттік хатшы Қанат Саудабаевтың төрағалық етуімен Қазақстан Республикасы Президентінің жанындағы Азаматтық мәселелер жөніндегі комиссияның мәжілісі мен Мемлекеттік рәміздер жөніндегі республикалық комиссияның отырысы өтті.
Мәжілісте Қазақстанның азаматтығын қабылдағысы келген шетелдік азаматтардың өтініштері қаралды. Кездесуде Қ.Саудабаев Қазақстанның азаматы болуға әртүрлі елдерден сан алуан адамдардың келуі Тәуелсіздіктің 20 жылында Тұңғыш Президенттің басшылығымен еліміздің әлеуметтік-экономикалық және қоғамдық-саяси жетістіктерге жеткеніміздің тағы бір айқын дәлелі екенін атап өтті. «Сондықтан біз өзіміздің қатарымызға тәуелсіз Қазақстанның жаңа азаматтарын қарсы алуға қуаныштымыз және жаңадан тапқан Отанында оларға денсаулық, амандық және жемісті табыс тілейміз», – деді ол. Осы ретте Мемлекеттік хатшы жауапты мемлекеттік органдардың ендігі міндеті Қазақстан азаматтығын алған адамдардың қоғамға тезірек бейімделуін қамтамасыз ету мәселелерін жылдам және жауапкершілікпен шешу екендігін ескертті.
Мәжілісте Қ.Саудабаев Елбасы тиісті Жарлыққа қол қойғаннан кейін ТМД елдері мен алыс шет елдерден келген 700-ден астам адам Қазақстан Республикасының азаматтары болатынын мәлімдеді.
Екінші отырыста комиссия төрағасы Қазақстан Республикасының Мемлекеттік рәміздері қазақ халқының еркіндік пен тәуелсіздік туралы ғасырлар бойы аңсаған арманын жеткізетіндігін атап өтті.
– Мемлекеттік Ту, Елтаңба, Әнұран – кез келген егемен елдің міндетті атрибуттары болып табылады. Сондықтан да қазақстандық жас ұрпақты тәрбиелеу мен патриоттық сезімді қалыптастыруда еліміздің Мемлекеттік рәміздеріне ерекше көңіл бөлінеді. Біздің Президентіміз Нұрсұлтан Назарбаев атап өткеніндей, Мемлекеттік рәміздер – біздің еліміздің, тәуелсіздігіміздің ажырамас бір бөлігі. Олар тәуелсіздіктің қасиетті біріктіруші бейнесін бейнелейді. Сол үшін де оларға көзқарасымыз, мемлекеттік органдардың, мемлекеттік рәміздерді насихаттау жөніндегі жұмыстарының тиімділігі қазақстандықтардың жалпы патриоттық деңгейін анықтайды, – деді Мемлекеттік хатшы.
Отырыс барысында Байланыс және ақпарат, Көлік және коммуникациялар министрлерінің мемлекеттік рәміздерді пайдалану және насихаттау жөніндегі жұмыстары туралы есептері тыңдалды. Соңында «Мемлекеттік рәміздер туралы» Қазақстан Республикасының Конституциялық заңының бұлжытпай сақталуы жөнінде ұсыныстар мен нақты тапсырмалар берілді.
Дастан КЕНЖАЛИН.