Иә, бәрі сол көрші елдегі «Бурановские бабушки»-ден басталған-ды. Замандастарының өнеріне тәнті болған әжелер игі бір идеяны іске асыру үшін, апта сайын жиналып, ән айтып, бойдағы дарындарын оятқан. Ілгеріде Сайрам ауданында бірі – ұстаз, енді бірі – дәрігер, есепші мен жеміс өңдеу зауытының технологы болған зейнеткерлер, атап айтқанда, Роза Үсенбекова, Күләш Бәйдібек, Әнипа Ысқақова, Ұлжан Оңғарбаева, Қалдыгүл Тұманбаева және Таңсық Бөрібекованың апта сайынғы «репетициясы» нәтижесінде өнер тобы өмірге келді. Біріге ән салып, мерекелік іс-шараларда өнер көрсете бастады. Көп ұзамай-ақ көпшілікке танылды. Әжелерді концерттік бағдарламаларға ғана емес, театрландырылған қойылымдарға, сондай-ақ музыкалық бейнебаяндарға түсуге шақыратындар көбейді. Ұлттық мерекелердің көзайымына айналды. Ал сахнаға арналған ұлттық киімдерді тіктіруге ұл-қыздары көмектесіпті. Өнер жолында қол жеткізген жетістіктері де аз емес. Мысалы, Ұлы Жеңістің 70 жылдығына арналған облыстық сайыста І орынды, облыстық патриоттық әндер байқауында бас жүлдені жеңіп алған. Ән арқылы жастарды отансүйгіштікке, туған жерді қастерлеуге, ынтымақ-бірлікке шақыруды мақсат еткен «Көркем әжелер» жуырда Астанада өткен «Қымызмұрындық» фестивалінде көпшілікті өз өнерлерімен тәнті еткен болатын.
Ғалымжан ЕЛШІБАЙ,
«Егемен Қазақстан»
Түркістан облысы